Редакция «Річника Руской Бурсы» оголошат конкурс. В звязку з 100. річницьом віче во Фльоринці, што дало початок Рускій Народній Республиці Лемків, запрашат ся взяти участ в літературным конкурсі присвяченым темі повязаній з тыма історичныма подіями. Оголошыня направлене є предовшыткым на учеників лемківского языка, як тіж на абсольвентів, матуристів і вшыткых, котры чуют добре перо до писаня прозом в лемківскым языку.
Основом конкурсу єст навязаня до подій з 1918-1921 рр., віче з 5. грудня/децембра 1918 р. во Фльоринці та загальні цілого політичного руху, якій обвявлений был при покликаню Руской Народной Республикы Лемків.
Форма конкурсовых текстів є свобідна. Орґанізаторы загаіли, што може то быти фактоґрафічна праца, але може быти тіж фікцийний твір, оповіданя з выдуманыма героями, акцийом. Конечным вымогом є тото, жебы на фоні цілого твору явили ся подіі, якы ідентифікуют речений час на Лемковині, але самособом і шырше в контексті цілой Карпатской Руси, де в тым часі проходили подібны політичны маніфесты.
Вымогы:
- текст писаний в лемківскым языку, од 5-15 стор.
- твір треба переслати на майльовий адрес орґанізатора rocznik.ruskiej.bursy@wp.pl до 10. листопада/новембра 2018 р.
За найліпшу працу признана буде нагорода в высокости 1000,00 зл. За ІІ і ІІІ місце – по 500,00 зл. Три найліпшы працы будут друкуваны в «Річнику Руской Бурсы 2018». Выімкы з текстів чытаны будут на упамятнінях 100. річниці Руской Народной Республикы Лемків.
Коментарі