Літературный фонд нагородив русиньску літературу. Выграли Співанкы нашой мамкы

В середу 24-го юна 2026-го року в Братіславі одбыло ся вручаня Цін і Премій Літературного фонду (Literárny fond) за оріґіналну творчость. Тот рік знова было оціньованя і трьох меншыновых літератур – мадярьской, русиньской і україньской.

Раз на два рокы Літературный фонд уділює Ціну і Премію імени Александра Павловіча за русиньску літературу. Тот рік оціньовали ся творы, котры были выданы за період років 2024 і 2025.

Жюрі, котра оціньовала русиньскы выданя приголошены до конкурзу, была в складі Михал Павліч – фаховый робітник Інштітуту русиньского языка і културы Пряшівской універзіты в Пряшові із заміряньом на літературу, Домініка Новотна – докторандка на русиньскім інштітуті, яка так само своє баданя має заміряне на русиньску літературу, і Івана Сливкова, яка діє на Інштітуті україністікы і середньоевропскых штудій Пряшівской універзіты.

Ціна Павловіча про співник

Ціну імени Александра Павловіча, найвысше оцініня, здобыла книга Співанкы нашой мамкы, котрой авторками суть Катарина Романякова і Марта Жагова із Хомутова. Тот співник у 2025-ім році выдало обчаньске здружіня Колысочка, яке веде Люба Кральова.

„Іде о співанкы із Камюнкы і румуньского села Скеюш, де ся в 1844-ім році переселило пару родин із Камюнкы, а пак по Другій світовій войні ся 200 русиньскых родин із Скеюша переселило на Чехы і на Мораву – на Судеты. Так зробила і родина Мартякова, котра пришла із Скеюша до села Троскотовіці коло моравского Зліна, а їх дівкы ся пооддавали до Хомутова,“ інформовала при выданю співника выдавателька Кральова.

„Там єдна із їх дівок, Катка Романякова із сетров Мартов Жаговов, основали ФК Скеюшан. Із їх репертоара выбрав 50 співанок Тімотей Федор, котрый їх знотовав,“ продовжовала выдавателька.

„Сьме рады, же ся нам подарило заховати і в нотовій подобі холем тых 50 скеюшскых співанок, пару співанок скомпоновала ведуча ФК Скеюшан – пані Катка Романякова,“ высловила ся о книзі, котра теперь была оцінена, Люба Кральова.

Оцінены далшы дві книгы

Окрем Ціны імени Александра Павловіча уділюють ся і Премії імени Александра Павловіча за оріґіналный твор в русиньскім языку.

Тот рік премію дістала книга Осїнь на Комарнику авторкы Марії Шмайдовой, котру выдав Сполок русиньскых писателів Словеньска, а так само книга Коцурик з Тополї, якой автором є Міро Жолобаніч. Другу споминану публікацію выдав тот самый выдаватель.

Нагороды за русиньску літературу

Літературный фонд уділює од 2005-го року літературну Ціну імени Александра Павловіча за найліпшый літературный твор написаный по русиньскы і Премії імени Александра Павловіча за літературный твор написаный по русиньскы, і за тлумачіня літературного твору зо словацького на русиньскый язык.

Ціны і Премії імени Александра Павловіча суть все удільованы творам, котры вышли в попередніх двох роках. Ціну і Премії уділює комітет Секції про оріґіналну літературу на пропозіцію жюрі.