Мадярьскый державный секретарь стрітив ся з представителями польской і русиньской меншыны

В децембрі минувошого року были зачаты стрічі представителів народностных меншын в Мадярьску з Міклошом Шолтесом, державным секретарьом з вопросів реліґійных і народностных звязків Канцеларії премєра Мадярьска.

8-го януара 2021-го року одбыли ся стрічі з далшыма двома меншынами – польсков і русиньсков, за котру была на події участна Віра Ґіріц і Віктор Крамаренко (на фотоґрафії з державным секретарьом). Інформовав о тім Міклош Шолтес на своїй сторінці на сіті Facebook.

В тот день стрітив ся наперед державный секретарь із Евов Марійов Ронаіни Слабов, посланкыньов Поляків у мадярьскім парламенті, і Марійов Фелфйолді, предсидательков Вседержавного польского самосправованя, з котрыма обговорили розвиток польской народноснтой меншыны у 2021-ім році.

„За нима пан державный секретарь стрітив ся із выбраныма представителями – як говорив Ференц Ракоцій ІІ. – ‚найвірнішого народа‘, Русинів, Віров Ґіріц, народнов посланкыньов Русинів у парламенті, і Віктором Крамаренком, председом Вседержавного русиньского самосправованя,“ пише ся на сторінці Міклоша Шолтеса.

„Міклош Шолтес подяковав їм за поміч у реалізації будованя ґрекокатолицькой церькви в Дебрецині и выразив надію, же у септембрі уже довєдна будуть брати участь на русиньскім отпусті в обновленій ґрекокатолицькій церьки у Шайовпалфолі,“ пише ся далше на офіціалнім сайті

„Да благословить Господь Бог жыючіх в Мадярьску Поляків і Русинів,“ закінчів державный секретарь інформацію о стрічі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА