Малыма кроками ближыт ся 42. Лемківска Ватра на Чужыні

Початок вакаций то добрый час на заплянуваня свого літнього календаря лемківскых/русиньскых подій. Хоц дата од років єст постійна – припоминаме, што в першый полный вікенд серпня/авґуста в Михалові на Нижнім Шлеску одбуде ся 42. Лемківска Ватра на Чужыні.

Попередні два рокы, якы были здомінуваны пандемійом, спричынили, што михалівска Ватра одбывала ся лем єден ден. Того рока подія одбуде ся по старому – буде тырвала два дни – 5. і 6. серпня/авґуста.

42. Лемківска Ватра на Чужыні зачне ся в пятницю. І ту ватрян жде новум, кєд же само офіцияльне розпаліня ватры буде дакус пізнійше – як ся уж буде змеркало, так жебы з положыня огня під найважнійше огниско в році зробити видовискове шов.

Інчом зміном в проґрамі буде тото, што офіцияльна част подіі, в котрій од років участ берут запрошены гості, в тым польскы самоурядовці, одбуде ся в суботу, значыт в другій ден Ватры, а не як бывало то до той поры – в пятницю. Прото тіж переданя Капітулом Стоваришыня Лемків тогорічной нагороды ім. Епіфана Дровняка – Никыфора одбуде ся в рамках той суботньой части, де правдоподібно буде найбільше участників подіі.

Музичный проґрам подіі буде збогаченый не лем локальныма ансамблями з Нижнього Шлеска, але і приіздныма, м.ін. з Пряшівской Руси – одкале, як вшытко піде згідно з пляном – орґанізаторы ждут аж трьох ґруп. Мали бы то быти два фольклорны колективы і єдна капеля, яка заграт пятницьову забаву до білого рана. В проґрамі не бракне і дебютантів.

Орґанізаторы заявляют, што в рамках 42. Лемківской Ватры будут одбывати ся і товаришучы подіі. То м.ін. дискусия посвячена 75. річници Акциі «Вісла», презентация лемківскоязычных выдавництв і інчы тематичны стрічы, котры в тым році мали бы проходити в специяльно зрыхтуваным шатрі. Подіі в рамках дискусийного панелю мали бы одбывати ся незалежно од того, што буде на головній ватряній сцені. Певністю не бракне і споминів выселенців – осіб памятаючых тернистый 47′.