«Мама Варголя» – нова платня од Толгаів

«Мама Варголя» два дни тому задебютувала на музычным рынку. По правді то сценічний дебют мала в червци/юнію 2017 р., а коли хочеме уж быти доцяп згідны з правдом, то студийний дебют Юлиі Вархолы прошол в 50. роках минулого столітя. Та може зробме порядок.

18. квітня/апріля 2018 р. вказала ся четверта платня ансамблю Толгаі пн. «Мама Варголя». Бєщадскы музыканты концертову презентацию нового материялу зробили уж влони, в червци/юнію, вчас фестівалю Схід культуры в Ряшові, а на записаны на кружку співанкы казали ждати аж дотепер. На платни находят ся народны русиньскы пісні, але дармо глядати типовых фольковых аранжаций. Толгаі, через рокы свойой діяльности, навчыли своіх слухачів, што така форма іх просто не інтересує. Не інакше є і тепер.

Співанкы, котры свому сынови любила інтонувати Юлия і котры за його намовом награла перед парудесятьома роками в професийным студию, тепер звучат в доцяп новым выданю. Трясучий ся, непрофесийний голос русиньской еміґранткы з Міковы переплітує ся з вправленым вокальом Мариі Юрчышын-Кулик з Толгаів. Хоц обі николи видіти ся не могли, то сучасна техніка дозволила на таку стрічу. На толгайовым кружку поміщено сім пісен з ориґінальной платні Юлиі. Награня не были змінены, а збогачены о вельо імпровізуваных звуків і голосів выпродукуваных м.ін. завдякы схоснуваню осягнінь ХХІ столітя.

Модерніст, неконвенцийональніст, аванґарда то приметы, котры мож певністю приписати творчости короля поп-арту. «Мама Варголя» є доказом на тото, што Толгаі інспірували ся не лем артистичном спадковином Юлиі, а і єй сына. Єднак то Варгольова мама і єй співанкы сут в центрі. Хочеме вказати іх світу, зато же мало хто знат, што мама Енді была таляновитом особом. Тота платня є доказом, як розмаіті мож брати з богатой культуровой дідовизны Карпат, котра нас фурт захоплює і є основом до креативного гляданя новых звуків через творчу інтерпретацию. Тоты неповторны мельодиі выполняют туга і любов до рідных стран выражены в артистичній синтезі, што найбарже нас захопила – бесідує Мария Юрчышын-Кулик.

Платню промує твір Дала ты ня о реляциі матери з дівком, котру выдано за старого фраіря. Дівка обіцює мамі, што аж і товды як буде далеко за лісами, за горами, то все найде дорогу назад і верне до ней. Як бонус на кружку нашол ся твір All Tomorrow’s Parties з платні The Velvet Underground & Nico. Фраґменты награнь нашли ся на звуковій стежці до другого сезону сериялю HBO Ватага.