Голосник

Друга молодіст співанок мамы Варголя

Пісні мойой мамы Юлиі то названя платні з русиньскыма народныма співанками, на котрій мож почути голос Юлиі Вархоловой (з дому Завацкой) – мамы Енді Варголя. То тіж наголовок проєкту реалізуваного русиньскым оперовым співаком Ігорьом Куцером і джазовыма музыками Emotion Group. По співанкы, котры товаришыли малому Енді, як вказало ся пізнійше – неповторній особливости артистичного світа, сягнули зас бывальці найважнійшых сцен музыкы світа в Польщы, а тіж і поза ньом – ґрупа Толгаі.

Юлия свою платню записала в 50. роках минулого столітя, Ігор Куцер не так давно, бо перед двома роками. Юлия співат іх невывченым, дакус трясучым, голосом, в простий спосіб, так як запамятала співанкы зо старого краю. Тоты самы пісні в версиі професийного оперового співака, якым єст Ігор Куцер, при акомпаніяменті цілого джазового складу надают ім доцяп новий тон – роблят з них творы. Концертoвы презентациі співанок професийного тенора і Emotion Group то свого рода перформенсы. Публика окрем слуханя музыкы мат нагоду і видіти архівальны знимкы родины Вархолів та приміры творчости Енді і самой Юлиі, котра была здібном, хоц непрофесийном, рысовничком. Вшытко окрашене єст коментарьом про дітиньство короля поп-арту і обставины, в якых ся выховувал. Не каждий свідомий єст того, же як раз русиньскій был першым і головным языком родины Вархолів в Пітсбурґу.

О ден, 22. червця/юнія, буде проходила концертова премєра платні Мама Варголя, котру того рока печатала неофолькова ґрупа Толгаі. Ансамбль даст выступ в рамках подіі Art Celebration, яка єст частю фестівалю Схід Культуры. Европейскій Стадіон Культуры, што од 22. до 25. червця/юнія проходит в Ряшеві. Концерт одбуде ся в просторах Підкарпатской Фільгармоніі ім. А. Малявского в Ряшеві.

Архівальны руснацкы співанкы Толгаі запрезентуют через звукы цимбалів, корбовой ліры та через народний голос вокалисткы Мариі Юрчышын. Толгайовы аранжациі збогачены будут і о характерне для них ґітарове, електроніче і головно джазове звучыня, самособом навязуюче до нюйорского андерґранду і артистичного світа Варголя. Печатаня новой платні Толгаів і концерт Art Celebration сходят ся з парома річницями. Того рока проходит 30. річниця смерти Едні Варголя а тіж 50. річниця вказаня ся культового кружка ґрупы The Velvet Underground & Nico, в продукцию котрого заанґажуваний был Енді (м.ін. запроєктувал окладинку). Ґрупа Толгаі покусила ся о награня двох коверів зо спомненой платні.

Ґрупа Толгаі то вызначний музычний колектив презентуючий русиньско-закарпатскій климат в джазовых, аж і трансовых аранжациях. В своім репертуарі мают лемківскы і бойківскы співанкы та пісні інчых наций і меншын жыючых в Карпатах. Ансамбль был оснований в 2000 році Даміаном Курашом і Янушом Демковичом. Музыка, яку оферуют своім слухачам, находит ся на пограничы фольку, етно-джазу і проґресивного рока з характерным вокальом Мариі Юрчышын. На своім конті мают 3 платні: A в Нєдзєля Рано, Стереокарпаты та Череда. Концертуют на сценах Польщы і Европы (Тренчын, Будапешт, Лондон, Мьольн та інчы), завандрували аж і до Африкы. Наштоден музыкы Толгаів спілпрацуют, або спілпрацували, з чысленныма передовыма артистами світовой сцены, м.ін. з Ґордоном Гаскельом, Джоном Льордом, Найджельом Кенеді, Майкельом Больтоном ци польскыма: Катажыном Носовском, Марийом Пешек, Кором, ґрупом Гей, Пінк Фройд і інчыма.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі