Марош Крайняк на фестівали в Ґорлицях

В днях 23.-26. вересня/септембра в Ґорлицях буде проходила друга едиция літературного Фестівалю ім. Зиґмунта Гаупта. Єдным з гостів буде Марош Крайняк – русиньскій писменник з Пряшівской Руси. Каміля Марґєльска, якій товаришыла буде тлумачка книжок М. Крайняка на польскій язык – Вероніка Ґоґоля, в суботній фестівальовий ден (24.09, 18.45 год.) бесідувала буде з автором про Лемківску Трилоґію, як названо в Польщы цикль його книжок: Карпатія (2011), Ентропія (2012) і Інформация (2013).

Марош Крайяк вродил ся в Вышній Ядловій к. Свидника, тепер жыє і працує в Братиславі. Скінчыл студиі в области соспільнoй роботы та Медженародову Школу Бізнесу. Занимат ся маркетінґом. Влони, накладом выдавництва Книжковы Климаты, вказали ся в польскым перекладі дві першы части Лемківской Трилоґіі: Карпатія (тлумачыня: Вероніка Ґоґоля) і Енторпія (тлумачыня: Мілош Валіґурскій), того рока печатана буде третя – Інформация (тлумачыня: Вероніка Ґоґоля). Вшыткы книжкы номінуваны были до престіжной нагороды Анасофт Літера 2014 – найважнійшой літерацкой нагороды на Словациі.

Проза Крайняка постерігана єст за єдну з ориґінальнійшых в Европі. Його оповісти, хоц позбавлены ілюстраций, сут барз плястичны. Автор заберат чытача в сурреалистичну вандрівку забытыма істориями Середньой Европы, назначеных русиньством. Остатня част Лемківской Тролоґіі, то істория двох молодых мужчын, якы по лишыню родинных сторін прібуют однайти ся в світі без перспектив. Федо студиює в столици і зачынат роботу в медженародовій корпорациі. Стає ся маленьком частю сучасного, цивілізуваного невільництва. Його приятель – Ваксо, плянче ся медже єдным а другым заробковым выіздом до Німец, ЗША і на Украіну. Оддыхом од лишеного ілюзий жытя єст вандрівка в гляданю маґіі Фльориньской Монархіі – фікцийной назвы русиньскых земель, навязуючой до покликаной через Лемків в 1918 р. Лемківской Республикы во Фльоринці. Інформация оповідат про привидно банальний проблем: жытя то постійне гляданя і втіканя, але -без огляду на напрям – стає ся лем ілюзийом. Чысто як фльориньска монархія, по котрій остатнім символичным танци, зо смертю стрыка Михала, вмерат єден світ.

Фестіваль Гаупта, якій другыраз орґанізуваний єст в Ґорлицях, мат задачу привернути памят про польского писменника Зиґмунта Гаупта, приближыти його творчіст і особу. Окрем того, причынити ся до розвитку польской літературной сцены та до промоциі чытальництва і вартістных явиск сучасной літературы і штукы. На тогорічну едицию запрошены сут м.ін.: Піотр Нестеровіч, Анджей Мушыньскі, Уршуля Гонек,  Кляра Новаковска, Міхал Ціхы, Міхал Ольшевскі, Маґдалена Кіціньска. Артистичным директором Фестівалю єст писменник Анджей Стасюк.

Орґанізаторами Фестівалю сут: Містецка Публична Бібліотека в Ґорлицях, Академіцкє Бюро Культуры і Штукы Альма-Арт, Выдавництво Чарне та Місто Ґорлиці.