Народжений в Ню Йорку – 3. лютого/фебруара 1939 р. – Майкель Чіміно то американьскій фільмовий режысер, сценариста і продуцент. За його найважнійший образ принимат ся «Полювача на єлені». Як режысер был нагороджений за тот фільм нагородом «Оскара». Найперше єднак придумал быти артистом плястиком. Студиювал ґрафіку в Мічіґан Стейт, а дале архітектуру, малярство і історию куншту на Єльськым Університеті. По скінченых студиях робил реклямовы і документальны фільмы, як тіж почал писати сценариі (медже інчыма до фільмів: «Молчливий біг» в 1971 р. і «Сила маґнум» в 1973 р. В 1974 р. завдякы помочы Клінта Іствуда дебютувал як режысер фільму «Перун і Скоробігач».
«Полювач на єлені» («The Deer Hunter»), котрий мал премєру в 1978 р., то воєнна драма про долю трьох камаратів, православных Лемків, Русинів мобілізуваных на войну в Вєтнамі. Сценараий того глубокого і зворушаючого фільму зосереджат ся на доказуваню консеквенций моральных выборів, воєнных злочынів, розповідат про розумліня патріотизму – раз як ідеі, а раз як социйотехнікы і важыня си основных жывотных вартости – камаратства, чести і родиинных русиньскых повязань. В образі маме доказы безгонорности, трачыня чести, супружой здрады, самовбивства, навет наркоманіі. Фільмовы кадры были зниманы медже інчыма в будинку – Лемко Галь в Клівленд, штат Огайо.
Лемко Галь – джерело вікіпедия
«Полювач на єлені» діждал ся нагорід Оскара аж в пятьох катеґориях, в тым за найліпшу режысерию для Майкеля Чіміно. В 1979 р. вчас фільмового фестівалю в Берліні делеґациі комуністичных держав демонстрацийно вышли з кіна, де проходила проєкция фільму, цілю запротестувати против «лжы і клеветі», з котрых гейбы тот фільм был сопоставлений. Аж до паду комунізму в Польщы «Полювач на єлені» был найдолшым «полковником», як звано фільмы одставлены на поличку, на індексі прогібітів, котры не можут быти нияк вказуваны.
Майкель Чіміно был найдений мертвий в суботу 2. липця/юля 2016 р. в хыжы в Беверлі Гільс.
Коментарі