Хоц, для празднуючых Великден подля юлияньского календаря, найблизший майовий вікенд то як раз стріча з Христовом Пасхом, то тіж перший майовий вікнед того рока принесе охочым Варшаты в Низкым Бескіді. То подія орґанізувана Стоваришыньом «Товариство з Низкого Бескіду» вєдно з Ґмінным Осередком Культуры в Устю Рускым, котры просят туристів і жытелів поблизкых сел на варшаты, котры одбудут в днях 30. квітня/апріля – 2. мая 2016 р.
Перший ден варштатів (субота, 30. квітня/апріля) то стріча з давном Лемковином. Участникы одвидят добрі знану слухачам радия лем.фм (з рациі шторічного орґанізуваного Стоваришыньом «Руска Бурса» табору для діти і молодежы), Лемківску Едукацийну Загороду Дзюбинівка в Ґладышові. Стрічу з лемківскым ремеслом та історийом поведут п. Ваньо і Данута Дзюбины. Початок подіі од 11.00 год., а передвиджений час варшатів то 2 год. (всутпне то лем 10 зл).
О ден, в неділю 1. мая, участникы перенесут ся до другого русиньского села – Ізб. Гын в аґротуристычній ґаздівці “Dom na Łąkach” од 16.00 год. будут ведены варштаты робліня ляльок-мотанок. Попри тым, присутны дознают ся про ріжны роды мотаных ляльок, іх істориі, та до чого колиси служыли.
Понедільок, 2. мая т.р., то поворот до Ґладышова. Од 11.00 год. одбуде ся стріча з пчолами, а радше з іх опікуном – п. Казиміром Мадзульом, котрий своє знаня і захопліня тыма овадами представит другым. В тот сам ден (16.00 год.,) зачне ся прогулька з неістнюючого уж села Білична через лемківскы лісы. Цілю лісной прогулькы є пізріти на красоту гірской природы і нагода на стрічу з вельома ґатунками рідкых птахів, котры прожывают в тій части Низкого Бескіду (кошт участи – 8 зл, а дохід буде переданий на тогорічны Стрічы Театральны «ІнНовиця»).
Більше інформаций о найблизшым майовым вікенді на Лемковині найдете долов на залученым афішы.
Коментарі