Мазярскє свято

Уж в найблизшу суботу, 26. серпня/авґуста, в ґорлицкым Лоси буде проходило дальше Свято Лосяньскых Мазярів. Кєд попри культурным проґрамі маш дяку дознати ся, што і як ся палит в пересічній мазярскій мастерни, а і чом сесе і оне мазяр бере зо собом в торговий світ своім табором, та не сід дома лем воз участ в тогорічній едициі подіі.

Орґанізаторы подіі, якыма являют ся Музей Дворы Карвациянів і Ґладышів – одділіня Мазярска Загорода в Лоси і Ґмінний Осередок Культуры в Ропі, того рока рішыли придати подіі госло, під якым буде она проходила – а сут ним «коні». Коні, сильны звірята, вдяка котрым мазярскы таборы дотерали гет далеко до середньо-східніх крайчыків Европы.

Подія зачне ся о 13.30 год. ініциятивом, зрыхтуваном Іваном Рубичом та Аґнєшком Павчак. Буде то презентация карты села Лося зо списком ґаздівок на 1939 рік, значыт іщы перед выселінями в 40. роках до Росиі, а пак в рамках выгнаня в акциі Вісла. В проґрамі выступліня ґрупы «Ославяне» з Моркого та ромскых ритмів і співанок при участи Терезы Мірґы і Кале Бала з Чорной Горы. 

В проґрамі, окрем спомянутого горі, одркыты презентациі та варштаты, в рамках котрых м.ін. буде мож навчыти ся выпаляти дегеть ци посмотріти на ковальску професию. Вступне на подію то символична злотівка.