Медже нами добрі єст

В суботу, 12. серпня/авґуста, на вершку Парковой Горы в Креници одбуде ся стріча з лемківском культуром пн. Медже нами добрі єст. В рамках подіі одбудут ся варштаты, панелі, а тіж концерт.

Діти, молодіж, дорослы і сеньоры будут мати нагоду взяти участ в розмаітых артистичных пленерах, якы приближат культурову спадковины реґіону. Надію ся, же подія буде претекстом до меджепоколіньовых бесід про штуку, культуру і кумшт природы, котра єст довкола – бесідує Каролина Фортуна з Фундациі Штука Театру, координатор проєкту, і додає: – То діяня «своіх» для «своіх» – барз цінне в того рода соспільных проєктах.

Вшыткы акциі проходити будут в неповторній сценериі Парковой Горы, природы, котра од все была інспірацийом творців. Панелі, опрацуваны через лемківскых і польскых специялистів, зроблено так, жебы были одповідні для каждой віковой ґрупы. Інтерактивний Театр Камішібай оповіст наймолодшым історию Епифана Дровняка-Никыфора. Дальшом частю проґраму сут плястичны варштаты для діти і молодежы інспіруваны творчістю Енді Варголя та Юрия Новосільского. Од 15.00 год. заплянувано чытаня лемківской і польксой поезиі через професийных акторів, а пак концерт – професийны музыкы грати будут комбінацию лемківской музыкы і джазу.

Вступне на вшыткы подіі єст дармо, а головным єй орґанізатором єст Фундация Штукы Театру. Проєкт спілфінансуваний єст зо середків Нацийонального Центра Культуры в рамках проґраму Культура-Інтервенциі.