Медженародне Бієнале Лемківской/Русиньской Культуры одкликане. Вступні перенесене на осін

В маю 2020 р. мало одбыти ся в Креници ХІ Медженародне Бієнале Лемківской/Русиньской Культуры. Як інформувал нашу редакцию ведучый Стоваришыня Лемків, Андрий Копча, майове Бієнале з причыны пандеміі коронавіруса было одкликане.

Покля што подію вступні перенесено на осін. Єднак тото, ци ся она одбуде, буде залежне од розвитку ситуациі, в тым предовшыткым од рестрикций вводженых державныма властями.

Ци ся одбуде?

Тогорічне Бієнале было заплянуване на 23.-24. мая. Його головным орґанізатором, як все, мало быти Стоваришыня Лемків вєдно зо Світовом Радом Русинів і при спілпрацы Міста Крениця.

Знаме, што Бієнале в тым місяци напевно не буде орґанізуване, але фурт не єст певне, ци перенесіня на осін буде реальне. «Подія мала быти традицийно в маю, але уж тепер знаме, што найскорше можеме ю зорґанізувати осіню на вікенд 10.-11. жолтня/октобра», бесідує Копча. Осіння едиция Бієнале уж раз ся одбывала. «Не є то нич нове. З орґанізацийом подіі осіню стрітили сме ся в 2014 р. Товды причыном был ремонт головной пияльні, котра на яр іщы не была скінчена», пояснят ведучый СЛ.

Панрусиньска стріча

Перше Медженародне Бієнале Лемківской/Русиньской Культуры прошло в 2000 р. Од початку подія была задумана на таку, котра, як выходит з назвы, буде проходила што два рокы. Переступны рокы, без креницкой акциі мали быти выполнены подібныма стрічами на полудньовій стороні Карпат – в плянах был недалекій Бардиів, пак Пряшів. Хоц пляны ся не зъістили, подія на добре вписала ся в шор цикличных подій міста Крениця.

Бієнале одраз было направлене на тото, штобы в його рамках тримати партнерскы односины з другыма орґанізациями, якы сут членами Світового Конґресу Русинів. Подія, што вказали дотеперішні єй едициі, єст місцьом, де продолжаны і творены сут новы ідеі і пляны тыкаючы розвитку Лемків/Русинів на загальносвітовым рівни.

Проґрам стрічы все має постійны елементы. Зачынат ся од панихіды над гробом Никыфора Креницкого – Епіфана Дровняка. Пак делеґациі кладут квітя при його памятнику в центрі міста. Одтамале іде хоровід до головной креницкой пияльні, де одбывают ся м.ін. концерты русиньскых ґруп.

Орґанізуваны сут і товаришуючы акциі, такы як вечеры поезиі, выставы, театральны пєсы. В часі подіі все засідат Світова Рада Русинів.

В маю мал быти і дальшый річник Русиньского Фестівалю во Свиднику. Перед парома днями вказала ся офіцияльна інформация, што так само был одкликаный. Нову дату подіі вызначено на 14.-20. вересня/септембра 2020 р.