Via Carpathia першый раз нашла ся на списку пріоритетовых інвестиций Евросоюзу. То ґарантує середкы для проєкту.
Европейскій Парлямент підтримал в половині квітня/апріля новелізацию розпоряджыня в справі проґраму Зъєднати Европу, котре закладат вписаня трасы Via Carpathia на унийну листу пріоритетовых інвестиций. Зъєднати Европу то новый фінансовый механізм, котрый в роках 2014-2020 заступил проґрам TEN-T. Европейска Комісия є тіж переконана о потребі продолжаня по 2020 р. проґраму Зъєднати Европу. Його ціль то підперати розвиток трьох обшыри: транспортовой, енерґетичной та телекомунікацийной сіти.
Порозумліня в справі новелізациі інструменту Зъєднати Европу было скорше осягнене в дорозі неґоцияций медже Европейскым Парляментом, Радом Евросоюзу і Европейском Комісийом.
Новелізация дозволит на фінансуваня з унийных середків стратеґічной для Польщы і Европы дорогы на єй трансграничных одтинках, прим. Ряшів-Барвінок. В тот спосіб Европейска Уния офіцийні вызнала значыня медженародного транспортового коридора Via Carpathia і дала згоду на вписаня вшыткых трансграничных одтинків на трасі од Литвы через Польщу, Словацию, Мадяры аж до Румуніі, разом з трансграничныма одтинками з Білорусьом і Украіном, в ґрупу проєктів фінансуваных в рамках фонду Зъєднати Европу. В рамках того інструменту реалізуваны будут найважнійшы транспортовы інвестициі в роках 2021-2027. То, же Via Carpathia была взята до увагы в фінансовым інструменті Евросоюзу, ґарантує середкы для проєкту.
Via Carpathia то плянуваный медженародный пут, котрый має вести з Клайпеды і Ковна на Литві через Білосток, Люблин, Ряшів, лемківскій Барвінок, Кошыці до Дебречына на Мадярах, а дале до Румуніі, Болгариі і Грециі. Має доходити м.ін. до румуньского порту в Констанци над Чорным Морьом та грецкых Салонік над Еґейскым Морьом. Цілый шляк в Польщы буде рахувал близко 760 км.
Коментарі