Меджі найліпшыма книжками ПСК три русиньскы і єдна о Русинах

І тот рік Пряшівскый самосправный край (ПСК) у співпраці з Крайсков бібліотеков Павла Орсаґа Гвієздослава выголосили конкурз під назвов Книжкы рока ПСК 2020. Быв то вже 4-ый річник того конкурзу.

Святочне передаваня оцінінь з выголошіньом переможців одбыло ся в середу 22-го септембра 2021-го року в просторах Центра реґіоналных документів у Пряшові почас літературного фестівалу Пряшів любить чітати (Prešov číta rád).

Конкурз мав дві катеґорії

„Цільом того конкурзу є пропаґація і підпора реґіоналной літературы выданой в попереднім році, повязаной з реґіонами нашого краю тематічно, особов автора, текстом або образовов частьов,“ інформовала Івета Гурна, директора бібліотекы.

Конкурз мав дві катеґорії. До першой належала красна література а література про діти і молодеж. До другой катеґорії належала фахова література, включно словарів, енціклопедій, духовной, публіцістічной і популарно-научной літературы.

„До конкурзу сьме прияли 40 номінацій, з того 16 тітулів з белетрії і 24 з научной літературы,“ інформовала Анна Зборанова з Методічного одділіня бібліотекы. В порівнаню з попереднім роком є чісло номінацій дакус менше, но то подля Зборановой овпливнила і сітуація повязана з ковідом.

Оцінены три русиньскы книжкы

Новотов 4-го річника были фаховы пороты. В катеґорії красной літературы і літературы про діти і молодеж на другім місці скінчіла подля оцінкы пороты по словацькы написана книжка Петра Мішака а Петра Вырлика з назвов Повісти і оповіданя карпатьскых Русинів (Povesti a príbehy karpatských Rusínov).

В катеґорії папуларно-научна література фахова порота уділила перше місце по русиньскы выданій книжці довгорічного русинського актівісты, етноґрафа Яна Калиняка зо Свідника під Русиньскы народны співанкы (Том 1), котру выдала Окресна орґанізація Русиньской оброды у Свіднику.

Якраз председа свідницькой оброды Мілош Стрончек перевзяв оцініня в Пряшові, кедьже автор з причіны довгодобых здравотных проблем не міг взяти на святочній події участь.

Русиньска література мала успіх і в рамках інтернетового голосованя, до котрого ся міг залучіти каждый заінтересованый. Ціну публікы здобыла в катеґорії белетрії русиньска збірка духовных стишків про діти під назвов Напю ся водічкы од Людмилы Шандаловой. В катеґорії фаховой літературу голосуючі на перше місце дали книжку далшого русиньского етноґрафа і актівісты зо Свідника Івана Чіжмаря під назвов Народный крой Русинів на фотоґрафії.

З номінованых книжок Крайска бібліотека Павла Орсаґа Гвієздослава в Пряшові приготовить путовну выставку, котра поступно перейде вшыткыма реґіоналныма бібліотеками, котрых зряджовательом є Пряшівскый самосправный край.

Жрідлфо ґотоґрафії: Podduklianska Knižnica Svidník.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА