Меншыны на Словакії бы мали дістати веце грошей

На слідуючій рік дала влада Словацькой републікы в недавно схваленій пропозіції розрахунку про розвиток културы народностных меншын на Словакії о 620 тісяч евр веце як того року. Інформує о тім офіціалный сайт уповномоченого про народностны меншыны і етнічны ґрупы в Словацькій републікы.

Тот крок має значіти далше наповніня єдной із пріоріт проґрамового выголошіня влады і владной коаліції, в котрім ся завязала вытваряти условії про розвиток народностных меншын в области всокочіня і розвиваня їх ідентічности, языка, културы і традіцій. Дотачный проґрам Култура народностных меншын  на рік 2017 по схваліню державного розрахунку в Народній раді Словацькой републікы бы мав діспоновати сумов 4 500 000 евр.

Фінанчны дотації, котры суть даны в рамках дотачного проґраму Култура народностных меншын, котрого ґестором є уповномоченый влады Словацькой републікы про народностны меншыны і етнічны ґрупы, будуть перерозділены міджі народностны меншыны подля сістемы, котру у Выборі про народностны меншыны і етнічны ґрупы з дакілько змінами і припомінками протисли представителі русиньской народностной меншыны.

В роках 2015 і 2016 было про народностны меншыны выділено з державного розрахунку 3 879 250 евр. Русины дістали з той сумы на свої културны події і актівности суму 294 032, котра была перерозділена міджі окремых жадателів і їх проєкты.  В році 2017 бы так векша сума мала іти і Русинам.

Уряд влады Словацькой републікы в співпраці з Урядом уповномоченого влады Словацькой републікы про народностны меншыны і етнічны ґрупы планує публіковати вызву на передкладаня жадостей в дотачнім проґрамі Култура народностных меншын 2017 почас місяця новембер т. р.

Остатній рік з дотачным проґрамом?

Владна партія Most-Híd вже ініціовала робочі стрічі одностно приятя закона о фінанцованю народностных меншын. На основі такого закона бы мав выникнути фонд на підпору културы народностных меншын. Most-Híd собі од того обіцять стабілізацію і одполітізованя підпоры народностной културы на Словакії. У фонді бы мало быти веце грошей (рахує ся коло 8 міліонів евр), обєм грошей бы мав быти стабілный, не мав бы ся міняти каждый рік, як тому є теперь, подля схваленого державного розрахунку на даный рік, і меншыны самы бы мали рішыти, як тоты грошы розділити. У вопросі найвекшого нароснутя обєму грошей, кібы ся закон прияв так, як го хотіла уж довшый час просадити партія Most-Híd, поміг бы головно Мадярям.

Заведжіньом фонду, подля пропозіції партії, бы перестав платити модел перероздільованя грошей міджі окремы меншыны, котрый просадив Округлый стіл Русинів Словеньска. Русины бы в рамках нового фонду дістали на свої културны актівности реално веце грошей, але то лем завдякы векшому обєму грошей обще выділеных на културу меншын. В рамках перецентуалного перероздільованя цілковой сумы на меншыны, бы на тім были гірше.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА