Меншыны в Сербії обговорили списованя жытелів. Меншыновы выборы будуть пізніше

Як інформовала аґентура Рутенпрес, у пятніцю 27-го мая 2022-го року одбыла ся в Палаці Сербії в Белеграді стріча Коордінації Націоналных совітів, котру вів Борче Величковіч, председа Націоналного совіту Македоньців.

На стірічі брали участь представителі вшыткых у Сербії признаных народностных меншын. За Русинів быв участный Борислав Сакач, председа Націоналного совіту Русинів. Найважнішым пунктом проґраму было списованя жытелів, котре буде проходити в Сербії аж тот рік в осени, кедьже было перенесене з причіны пандемії.

Меншыны ся боять резултатів головно в діаспорі

На стрічі были і представителі Републікового штатістічного уряду, котры представителів меншын інформовали о детайлах списованя, наприклад якы формуларі ся будуть в рамках списованя в октобрі выповняти.

Штатістічный уряд вєдно і Міністерством про людьскы і меншыновы права зрядив іщі перед тым робочу ґрупу, в котрій мали своїх людей і націоналны совіты за окремы меншныы, і з котрыма ся радили, як буде вызерати списованя, головно тота часть, яка односить ся ку меншынам.

Як аґентура інформує, Націоналны совіты боять ся, же членів народностных меншын буде менше як при остатнім списованю, і хоць было пропоноване і електронічне списованя, вшыткы мають страх з того, як ся буде записовати діаспора. Припоминаме, же Сербія довгодобо терпить міґраційов своїх гражданів за роботов до іншых держав, што може неґатівно овпливнити штатістічны даны і у меншын.

Меншыновы выборы ся перенесуть на пізніше

В тот самый день засідав і Републіковый совіт про народностны меншыны. Стріча проходила на Уряді влады і вела єй предсидателька влады Сербії Анна Бырнабіч вєдно із міністерков про людьскы і меншыновы права Ґорданов Чоміч. На тій стрічі было участных вшыткых 22 націоналных совітів і жыдівска общіна.

Премєрка Бырнабіч представила дакілько актінвостей, котры суть важныма в слідуючім періоді про націоналны совіты. Припомянула, же в юні буде закінчене творіня Акчного плану про творіня прав народностных меншын. Іде о документ, котрый підтримала Европска унія і Рада Европы, а давать Сербію до позіції країны, котра в повности припознавать права народностных меншын.

На обидвох стрічах была участна і державный секретарь Міністерства про людьскы і меншыновы права Олена Папуґа.

На Републіковім совіті про народностны меншыны обговорила ся і тема перенесіня выборів до націоналных совітів на пізнішый термін. Выборы мали быти в новембрі, лемже іщі лем в октобрі буде проходити списованя. Покля бы ся выборы не перенсели на пізнішу дату, мусили бы проходити дві про меншыны важны кампані в єднакім часі.

Новый термін выборів не быв іщі становленый, кедьже то мусить быти одконзултоване і в згоді з односным законом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА