Метрополіта Лавр має памятник

В Споєных штатах Америкы одкрыли памятник Русинови. За інформаціями порталу „РИЯ Новости“ 4-го децембра 2015 р. быв одкрытый бронзовый памятник із пєдесталом з ґраніта патріархови Московскому і цілой Руси (РПЦ) Алексійови ІІ. і метрополітови Російской православной церькви за граніцьов (РПЦЗ) Лаврови. Памятник находить ся коло Катедралного собору св. Александра Нєвского у Говелі в штаті Ню Джерсі.

Памятник є присвяченый в честь зъєдиненя Російской православной церькви за граніцьов із Російсков православнов церьквов. На церемонії одкрытя брали участь ґенералный конзул Росії в Ню Йорку Іґорь Ґолубовскый і представителі духовенства Московского патріархату і РПЦЗ.

Бронзовый памятник із пєдесталом з ґраніта має коло 20 тон. Выробленый быв у Росії і быв пожертвованый РПЦЗ од російского народа, жебы припоминав момент Акту о канонічнім зъєдиненю РПЦЗ і РПЦ, котрый быв підписаный в Храмі Хріста Спасителя в Москві у 2007 році.

Секретарь Выходно-америцькой єпархії РПЦЗ протоєрей Серґій Лукянов про „РИЯ Новости“ повів, же такы памятникы суть лем два. Єден быв недавно одкрытый в Курску, де патріарха Алексій ІІ. і метрополіта Лавр тримають в руках Курску ікону Божой Матери. В США мають в руках макету Катедралного собору Хріста Спасителя, де быв підписаный акт.

Хто быв метрополіта Лавр

Метрополіта Лавр народив ся як Василь Шкурла 1-го януара 1928 р. в Ладомировій, русиньскім селі на Пряшівскій Руси (Словакія). Як єденадцятьрічный вступив до монастыря преподобного Йова Почаєвского в Ладомировій. У 1944 році одышов із монахами до Споєных штатів Америкы. У 1947 році став ся рясофорным монахом і прияв мено Лавр. У 1954 році закінчів Святотройцьку духовну семінарію в Джорданвілі. У 1967 році быв высвященый на єпіскопа. В році 1981 ся став архієпіскопом. Од 2001 року быв метрополітом выходо-америцькым і нюйорскым РПЦЗ.

Лавр має велику заслугу на тім, же РПЦ і РПЦЗ ся по 90-ох роках знова зъєдинили. У 2002 році ся офіціално стрітнув із презідентом Російской федерації Владиміром Путіном зо заміром зближыти церькви. Процес взаємных їднань завершыв ся о пять років пізніше, 17-го мая 2007 року в Москві. Умер метрополіта Лавр 16-го марца 2008 року в Джорданвілі в США.

На фотоґрафії: Метрополіта Лавр і патріарха Алексій ІІ. коло святочного моменту зъєдиненя РПЦЗ і РПЦ.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА