Місцевы назвы на Лемковині

В найблизшый четвер, 10. червця/юнія, о 11.00 год. буде нагода брати участ в онляйновій прелекциі дра Войцєха Крукара на тему лемківской і бойківской топоніміі Низкого Бескіду і Бєщадів.

Стріча проходила буде в рамках Номінариюм – ономастичных семінарів Польского Ономастичного Товариства і Працовні Ономастикы Інституту Польского Яызка Польской Академіі Наук. Доповід трансмітувана буде через плятформу ZOOM, охочы єй выслухати прошены сут прислати зголошыня на майльовый адрес nominarium.poltowonom@gmail.com, жебы достати мотузок до стрічы.

Документация назовництва

Про дра Крукара бесідуют, што назвал горы, зато што од парунадцетьох років веде соспільну документацию-реконструкцию традицийного теренового назовництва Бєщадів і Низкого Бескіду.

Вчас прелекциі омовит він м. ін. соспільны условя топоніміі Низкого Бескіду і Бєщадів, картоґрафічну документацию назовництва, представит результаты досліджынь: кількістне зоставліня тыкаюче баданых сел, найденых інформаторів, удокументуваных названь, зробит перегляд выбраных лемківскых і бойківскых топоґрафічных термінів ци оповіст про выбраны культуровы названя і зміны границ лісів.

Назване-неназване

Др Войцєх Крукар єст автором і редактором вельох туристично-топономастичных мап, туристичных путівників, парудесятьох дописів з обшыри туристикы, крайознавства, картоґрафіі та ґеоґрафіі. Топономастичну документацию веде од студентскых часів.

Пригоду з привертаньом місцевых назв зачал в околицях Команчы. През парудесят років роботы повело ся одтворити аж 8 тисячів назв. Горы, верхы, лісы, потокы, поля – одзыскали своі ориґінальны назвы. Част назв уж была, але напр. міцно переіначена, бо коли Австриякы робили в другій половині ХІХ ст. мапы цілой Ґалициі, не до кінця правильні записували звычайовы назвы од місцевых люди. Часто нич не поміщали.

Пак мапы схоснувал як взір Войсковый Ґеоґрафічный Інститут, і хоц мапы дотепер становлят безконкуренцийный взір під ґрафічным взглядом, то не было на тілько часу, жебы провірити докладні назовництво. Переписано іх з австрийскых мап, на жаль – зас з блудами.

Др Крукар выкорыстал остатній момент, жебы тоты назвы одтворити. Преіздил піл Польшы, жебы найти давных мешканців выселеных сел і при іх помочы привернути місцям іх ориґінальны назвы.

Фот. джерело: karpaccy.pl