Місяц Материньского Языка ЯУ. В його рамках языковий конкурс

В рамках орґанізуваного Місяця Материньского Языка, Ягайлоньскій Університет в Кракові запрашат взяти участ в конкурсі під назвом «на Бесіду» (з поль. “na Gadkę”). Буде то уж третя едиция подіі, за орґанізацию котрой одповідат Выділ Польоністикы ЯУ при спілпрацы з Науковым Кружком Студентів Языкознавців ім. Мєчыслава Карася та Товариством Любителів Польского Языка.  

Конкурс полігат на сотворіню невершуваного ориґінального монолоґу на тему «Наша реґіональна достоменніст». Языком выступліня має быти місцевий діалект, реґіональний або меншыновий язык. Оціні підлігати будут так языковы прикметы тексту, як і правильна вымова в даным языку, але і елементы звязаны зо змістом, м.ін. приводженыма гуморесками, родииныма істориями ци звязаны з традицийом і народнима віруванями. 

Зголошыня до конкурсу были выдолжены до 28. лютого/фебруара т.р. 8. марця поданы будут результаты. Дальше, 16. марца на Выділі Польоністикы Ягайлоньского Університету одбуде ся фінал. Склад жырі покликаний буде Деканом Выділу Польоністикы ЯУ, спосеред орґанізаторів, выдатных дидактиків та знавців меншыновых діалектів та языків. 

Місяц Материньского Языка проходил буде од 21. лютого/фебруара до 25. марця т.р. Серед ріжных подій, котры одбудут ся в його рамках, находит ся тіж наукова конференция. Темы выступлінь будут односити ся м.ін. до справ языковой достоменности, ідентифікациі, білінґвізму і ін. Деталі повязаны з конкурсом – за мотузком.