Модернізация Головного Бескідского Шляку

«То буде успіх» – повіл віцемаршалок Пьотр Пільх, зараз перед підписаньом догварінь з партнерами, з котрыма підкарпатскє воєвідство задбат о новый вид Бескідского Шляку. «Головный Бескідскій Шляк – Центр Активной Туристикы Польскых Карпат» то стратеґічный проєкт Самоуряду Підкарпатского Воєвідства. Веце як 22 млн зл – таком квотом з реґіонального проґраму Европейскы Фонды для Підкарпатя 2021-2027 буде дофінансуваный проєкт. Цілый його кошт то 26 млн зл, зато решту выложыт самоуряд підкарпатского воєвідства.

Проєкт реализуваный єст в партнерстві з Ґміном Буковско, Бєщадскым Нацийональным Парком та Надлісництвами: Команча, Рыманів, Буковско і Тисна.

О дрібницях проєкту, на хвилю перед підписаньом догварінь, бесідували на пресконференциі в понедільок 3. червця/юнія в Маршалківскым Уряді його представникы: віцемаршалок воєвідства Пьотр Пільх, членкыня заряду Малґожата Яросіньска-Єдинак і запрошены гості, м.ін. др Ришар Прендкі – директор Бєщадского Нацийонального Парку, ци війт ґміны Буковско – Марек Баньковскій.

Нове ознакуваня, нова інфраструктура, ремонты

«Барз ся тішу з днешнього підписаня догварінь. 26 млн зл іде на барз важный шляк. Мал єм колиси приємніст го перейти і знам, же туристы хотят ним путувати. То важне, жебы сме поправили і створили нову інфраструктуру для туристів і удоступнили як найвекшу част одтинків для осіб з особливыма потребами» – повіл на пресконференциі віцемаршалок Пьотр Пільх. «Тот проєкт єст важный для Бєщадів, але не лем. Там не бракує туристів, хочеме промувати і дати ім можливіст познати Буковскє Погіря, Ясельскє Погіря, Низкій Бескід – бо там тоты пути будут розвиваны. Будеме поправляти інфраструктуру шляку, але тіж вказувати місця важны для істориі тых земель, напримір цмонтері з часів І і ІІ світовой войны» – додал.

Головный Бескідскій Шляк то єден з найкрасшых в Польщы. Веде через цілы Бєщады, Низкій і Сандецкій Бескіды, пак через Ґорцы і Жывєцкій і Шлезскій Бескіды. Його долгіст то близко 500 км, веде через три воєвідства: шлезскє, малопольскє і вкінци – підкарпатскє.

«То важный проєкт в контексті промоциі туристичных примет. Добрі сме ся зрыхтували до реализациі того проєкту. В 2022 році провели сме аудит. Анализа тыкала того, як мож зревітализувати шляк, што єст потрібне» – бесідувала на конференциі Малґожата Яросіньска-Єдинак з заряду воєвідства. «Хочеме, жебы проєкт реализуваный по страні Підкарпатя был компатибільный з проєктом реализуваным Малопольщом. Хочеме, жебы як найвекша част шляку была достосувана для потреб осіб з неполноспрявностями» – продолжала.

Основным цілю проєкту є поправа інфраструктуры Головного Бескідского Шляку на обшыри підкарпатского воєвідства. Змодернізуване буде ознакуваня цілого одтинка шляку на обшыри воєвідства, буде зробленый інтернетовый сайт, на котрым найдут ся промоцийны материялы ци опрацуваня комплексовых пропозиций прогульок обнимаючых Головный Бескідскій Шляк з додатковыма культуровыма, природничыма, історичныма описами.

Буковско, Прелукы, Команча, Волтушова і інчы

Додатково, в Буковску вознесут видокову вежу і траперску хыжку. Попри вежы буде мала інфраструктура – мультімедияльна лавка з консольом для одслуханя інформаций о околици, буде інформацийна таблиця, стояк на роверы, деревяна лавка.

«Тот шляк лучыт Східні Карпаты з Західніма, лучыт м.ін. Маґурскій Нацийональный Парк з Бєщадскым (…) ,де єст і Волосате, в котрым заплянували сме нашы діяня. Маме там уж розбудувану туристичну інфраструктуру, але хочеме дати туристам веце можливости, бо каждого рока приходит до нас 700 тис. гости» – бесідувал Ришард Прендкі, директор Бєщадского Нацийонального Парку.

В Надлісництві Команча будут вознесены туристичны крыівкы-притулкы до хованя ся перед дощом: при резерваті «Камін над Репедю», при брамі «Східні Карпаты – Західні Карпаты» в Прелуках ци на «Лікти» в Душатини. «Будут поміщены історично-інформацийны таблиці в парох важных місцях, м.ін. при памятнику неожывленой природы в Душатини» – бесідувал в сідибі маршалківского уряду Пьотр Ланьскій, надлісничный Надлісництва Команча.

В Пасмі Буковици і околицях Рыманова інвестицию вело буде Надлісництво Рыманів. «Наша специфіка є така, же маме туристів, котры приходят до нас на вікенд, і хотят го активні провести. Зорґанізуєме ім до того ліпшы можливости. Нове схороніня выбудуєме на скрижуваню Головного Бескідского Шляку з зеленым шляком ПТКТ під гором Скыбці, наступный буде медже Пулавами а Команчом-Скыбці. Одкрыта одпочынкова шопа появит ся в Волтушовій, а рекреацийна буде поставлена в Рыманові» – оповідал Павел Панась, надлісничный Надлісництва Рыманів.

О інвестициях в околицях Тисной бесідувал Ґжеґож Лукацієвскій, надлісничный Надлісництва Тисна. По пресконференциі партнеры проєкту підписали одповідні папері, а пак станули до спільной знимкы.

Фот. Facebook Podkarpackie – serwis samorządu województwa