молоды.Русины про І Чехословацку Республику

В понедільок, 19. лютого/фебруара 2018 р., oбщество молоды.Русины просит на стрічу членів і любителів той молодіжной орґанізациі, яка пройде в Братиславі о 19.00 год. в просторах малой салі Університецкого Пасторачного Центра в Млиньскій долині.

В рамках проґраму, окрем інтеґрацийной стрічы, пройде проєкция нового документального фільму присвяченого тогорічній 100. річници основаня сполочной державы Чехів, Словаків і Русинів – І Чехословацкой Республикы (1918-1938 рр.). Фільм пн. В хападлах великодержав. Битва підкарпатьскых Русинів о місце в родині европскых народів мал премєру 13. грудня/децембра 2017 р. в Конґресовым Центрі Університету Коменьского в Братиславі.

По фільмі одбуде ся стріча і свобідна бесіда про його зміст з продуцентом Янком Липиньскым. Липиньскій як председа м.ін. Здружыня Інтеліґенциі Русинів Словациі проповіст про думку і ціль його нового фільму, якій офіцийно был вытворений як раз в рамках діяльности той русиньской орґанізациі. 

Припоминаме, што Округлий Стіл Русинів Словациі 2018 рік выголосил як рік І Чехословацкой Республикы. З той нагоды кінцьом січня/януара т.р. прошло засіданя ОСРС, на котрым вырішено плян святкувань 100. річниці выникнутя Республикы.