Мож ся уж записувати на Родинний Табір до Завадкы!

Кєд іщы сте не рішыли, што робити разом з дітми на вакациях, то припоминаме, же в дн. 5.-12. липця Стоваришыня Карпатка орґанізує Родинний табір в лемківскым селі Завадка Рыманівска, якому лем.фм патронує (писали сме о тым гев).

Табір то тыжньова стріча діти, молодежы та дорослых, выполнена вшелеякого рода варштатами (музычныма, танцувальныма, рукодільныма, плястычныма, чачкарскыма), а вшыкты інспіруваны традицийном, народном культуром. З русиньскых пунктів проґраму орґанізаторы вычысляют м.ін. варштаты лемківскых танців і співів, звыкы, а окрем того, заграют гудакы з ансамблю Кычера.

Мож ся уж записувати на Табір, а орґанізатор пропонує вельо можливости. Мож на цілий Табір, мож лем на выбраны варштаты і стрічы, мож з єдном дітином, або з двома і більше, а мож навет і без дітины 😉 Дрібниці найдете за тым мотузком.

А мож тіж долучыти до табору як вольонтер – і таку можливіст забезпечаат орґанізатор. Дрібниці – гев.

А жебы вшытко повело ся так, як си тото заплянувало Стоваришыня Карпатка, треба ім кусцьок помочы – в звязку з тым, же од Міністерства достало меньшу, як влони, дотацию, орґанізатор веде акцию збераня додатковых фондів. Каждий з нас може вплатити тілько, на кілько мат охоту. Вплачати можете за тым мотузком.