Мож уж придбати білет на тогорічний Русиньскій Фестіваль во Свиднику

Од початку марця т.р., мож набывати білеты на тогорічне свято русиньской культуры во Свиднику – V Русиньскій Фестіваль. О тым факті заявлили орґанізаторы на офіцияльным фанпейджы фестівалю в сіти Фейсбук.

Як і влони, ціна білету на подію в передпродажы є туньша і на днешній ден то лем 3 евро. Треба ся спішыти, бо уж в квітни/апріли ціна підскочыт до 6 евро, жебы конечно од мая давати за вступне 9 евро. Припоминаме, же в ціні білету обзераючы годны видіти полны три дни головного проґраму. Всутпне на подію мож придбати на сайті www.ticketportal.sk, a за детальнійшыма інформациями (м.ін. знижкы на діти) чытайте на сайті РФ.

Тогорічна пята едиция Русиньского Фестівалю во Свиднику пройде в днях 22.-28. мая. То цілотыжньова культуральна подія, котра окрем сценічных выступів рыхтує про Русинів і любителів русиньской культуры ріжного рода другы ініциятивы, напр. посвячены русиньскому языкови, істориі і літературі. Розмаітий проґрам фестівалю каждий рік притігат більше чысло участників, а головний орґанізатор, якым є Окресна Орґанізация Русиньской Оброды во Свиднику, каждом слідуючом едицийом старат ся, жебы проґрам был інтересний і одповідал актуальным трендам. То такой єдиний фестіваль, де культура Русинів, вказувана в свидницкым амфітеатрі в виді выступлінь фольклорных ансамблів, музычных, співацкых і танцувальных колективів, все дополнена єст о другы акциі – театральны пєсы, проєкциі фільмів, выставы, доповіди, даючы шырокій образ русиньской высокоякістной культуры.

Сам Русиньскій Фестіваль во Свиднку за остатніх шіст років выріс до мена бодай найбільшой того рода подіі в русиньскым світі. Саморідніст фестівалю проявлят ся як раз в тым, же не є він типовым на днешні часы фестівальчыком з печеном кобасом і пивом, при котрых позерат ся часом і на выступліня ансамблів, але великій настиск кладений єст на рыхтуваня другых акций, што істо підносит його ранґу. Треба і тото підкрислити, же фестіваль приготовлює проґрам для вшыткых віковых катеґорий, в тым і заміреным на молодіж і діти.

Тогорічным шов, котре має іщы більше звернути увагу світа на Русинів, є оголошыня новой атракциі. То конкурс на найркасшу Русинку світа – Miss World Rusyn / Найкрасша Русинка, котрий буде проходил 25. мая 2017 р. В ефірі радия ЛЕМ.фм час-до-часу мож чути короткы джінґлі, загнаны про наше радийо орґанізаторами, в котрых пошырюют они рекляму і принципы участи в плебісциті.

Медияльна Ґрупа ЛЕМ.фм, попри інчых русинькых і нерусиньскых медиях, дальший рік была попрошена тримати медияльний патронат над подійом, што радо робиме, передаючы Вам вшыткы інформациі о приближаючым ся фестівали.