Музычний спектакль «Кычеры» на ватрі в Михалові

Приближат ся тогорічна ХХХVI Лемківска Ватра на Чужыні. Уж в найблизший вікенд (5.-6. серпня/авґуста) михалівскє ватряне поле на два дни стане ся місцьом великой стрічы Лемків, котры цілий рік ждали на тото свято культуры. Хоц – як все, так і того рока – найбільше буде діяло ся на сцені (о чым заявляли сме за тым мотузком), єден ансамбль з ней зыйде, жебы на ватряным поли вказати зрыхтуваний проґрам. То новий проєкт Лемківского Ансамблю Пісні і Танця «Кычера», котрий на тогорічну Ватру приде з новым проґрамом – музычным спектакльом пн. «Лемківскы Собіткы», котрого премєру буде мож взріти як раз в Михалові.

Премєровий выступ «Кычеры» орґанізаторы заплянували на суботу (6.08) о 21.00 год. Видовиско одбуде ся попри сцені, на одкрытым просторі, де акторы будут палити собітку і представляти обряды Велиі Святого Яна. 

• Сценарий, режысерия та вокальне прирыхтуваня: Оксана Терефенко,
• Музычний кєрівник: Андрий Олійник,
• Хореоґрафія: Анна Быбель, Юрий Стариньскій,
• Артистичний кєрівник: Анна Прокопчак,
• Ґрафіка: Аґнєшка Пальчак.