«Музыка без границ» в Явірках уж в неділю

В надходячу неділю, 30. липця/юлия, в Явірках на Шляхтівскій Руси в рамках упамятнінь 70. річниці акциі Вісла буде проходил концерт. А реалізуваний він єст як част проєкту «Музыка без границ», цілю котрого єст удокументувати музычну культуру Русинів зо Спиша, польско-словацкого погранича. Першы інформациі о проєкті принесли сме гев. На концерті запрезентуют ся русиньскій ансамбль Барвінок з Камюнкы, Майдан з Литмановы та Яворцанє з Явірок.

Проєкт «Музыка без границ» рушыл на яр того рока. Першым його етапом были тереновы досліджыня (награня, бесіды, знимкы, збераня материялів до аналізы) ведены координаторком проєкту др Юстином Чонстком-Клапитом, Аліном Добошевском, режысером Кжыштофом Кжыжановскым та Пьотром Клапитом.

Повело ся нам стрітити з інтересуючыма людми по обох странах границі – реляцийонує заанґажувана в проєкт Аґнєшка Стопка, русиньскы предкы котрой походят з Чорной Воды. Бесідували сме з найстаршыма жытелями Великого Липника, Камюнкы (в тым з обдареном пречудовым голосом 87-літньом Ольгом Зимовом), Литмановы (де поляновы співанкы называны сут майдановыма), як тіж представниками фольклору Пєнін – Яніном Ґавлік і Анджейом Дзєдзіном-Вівером зо Щавници, Яном Кубіком і Марияном Ярошом. 93-літній Базилі Гнадкович, Русин з Явірок, якій тепер жыє в Освєнцімі, дал вельо інтересуючого музычного материялу до досліджынь. Інспіруючы інтервю переведено з родином Стопків, Анном Венґлярчык та Геленом Лазарчык, дівками Карпяків, корінных жытелів Білой Воды – продолжат Аґнєшка Стопка.

На початку мая місцьом музычной інтеґрациі і гляданя спільного репертуару была стара хыжа в Чорній Воді. Пєніньскы ґуралі і Аґнєшка Стопка слухали награнь зо Словациі та співаня Базилі Гнадковича і мали за задачу іх розпознати. Пару нот повело ся зідентифікувати і найти іх одповідникы по обох странах границі.

В другій половині червця/юнія продолжано діяня проєкту. 24. червця/юнія разом з ґуралями з польской страны поіхали сме до нашых камаратів – ґуралів зо Словациі – оповідат ініцияторка проєкту, Юстина Чонстка-Клапита. Во вшыткых селах, де сме были, принимано нас в милій, приємній атмосфері, всядиль нас частувано. Музыка підносила вшыткых на духу, зміцняла реляциі понад границями. Симпатичні зачудувал нас Анджей Дзєдзіна-Вівер, котрий вчас каждой слідуючой візиты в черговых місцевостях, окрем співаня, на біжучо творил вершы оддзеркаляючы поетичний характер тых стріч. В Литманові перший раз од долшого часу специяльні на тоту нагоду зобрала ся ґрупа знамениті співаючых хлопів, гармонійні зграны, сильны голосы і вельоголосовы співы котрых добияли ся ехом по поляні (майдані). Сердечні дякуєме нашым партнерам – ґуралям і Русинам з обох боків границі – за участ в добрій справі і жычливе принятя. Тепер лем ждати аж 30. липця/юлия в Явірках запрезентуют на сцені результаты той стрічы – тішыт ся координаторка.

Спілорґанізаторами недільного концерту сут Містецкій Осередок Культуры в Щавници та парохія покровы Божой Матери Посередничкы Божой Благодати в Щавници. Выступы попереджены будут Службом Божом.