«Музика Заклята в Дереві» з новом формулом

Тогорічна, 15. едиция Фестівалю «Музика Заклята в Дереві» проходит в новій формулі. По інавґурациі, котра одбыла ся 6. червця/юнія концертами в Бічу і Бінаровій, дальшы концерты пройдут в єден вікенд 6.–8. серпня/авґуста, м.ін. в Мазярскій Загороді в Лоси.

Ювілейна едиция Фестівалю дакус інча од попередніх. Концерты не проходят в кажду неділю в ріжных обєктах, што ся находят на Пути Деревяной Архітектуры в Малопольщы, а скумулюваны сут в єден серпньовый/авґустовый вікенд.

Як все – не бракне лемківской музикы

Того рока буде мож послухати Оркєстру Святого Миколая, котра не містит ся в рамках жанрів і музичных стилів. Од років черпле з богатства традицийной музикы, але робит тото в індивідуальный спосіб, якій лем пошырює чысло любителів Миколаів. Ґрупа заграт 6. серпня/авґуста в урокливым місци – Мазярскій Загороді в Лоси. Звязок Оркєстры з традицийом зачал ся як раз од лемківской музикы в 80. роках ХХ ст. Не смотрячы на рокы гляданя новых інспіраций, Миколаі остают вірны лемківскому фольклорови, котрый фурт є важным елементом іх музикуваня.

На наступный ден, 7. серпня/авґуста, пройдут аж два концерты. Капеля Тімінґерю (Kapela Timingeriu) то родинна капеля. Грают і співают жыву, полну енерґіі, провокуючу до танця інтерпретацию ромской, балканьской і жыдівской музикы, творячы атмосферу до неограниченой ничым забавы. На репертуар концерту складала ся буде традицийна музика нацийональных меншын в Польщы.

Того самого дня, вечером, в бароковых інтерєрах костела св. Михала Архангела в Шальовій выступит трійка молодых талановитых музиків: Артур Плінта – контратенор, Аґнєшка Подлуцка – бароковы гушлі, та Наталия Ольчак – клявесин, в проґрамі «Німецкій порядок контра італияньскій порядок». Буде мож почути творы такых музичных ґеніів, як Гандель, Вівальді ви Монтеверді. Буде то істория про дві сильны музичны нациі. Вкаже на внутрішні і зовнішні стилистичны ріжниці Німец і Італиі.

«30 років як єден концерт…»

Фіналом Фестівалю буде концерт ансамблю, якій знаный є на польскій сцені од 30 років. Раз Два Три вказує, што мож долгы рокы іти свойом стежком, тримати ся своіх думок і естетикы і мати при тым популярніст, тішыти ся атенцийом любителів і жычливістю критиків. Ансамбль, в собі лем знаный спосіб, знат лучыти літературный талант Адама Новака з музичном фінезийом і фантазийом, творячы свій, характеристичный і розпознавальный музично-літературный язык.

Ґрупа заграла тисячы концертів, од малых клюбів по великы концертовы салі. Дальшый з них, «30 років як єден концерт…», вызвучыт на пленеровій сцені при костелі свв. Пилипа і Якова в Санковій.

Вступне на вшыткы концерты дармо. Веце інформаций найдете на сайті drewniana.malopolska.pl.