«На фіґлярску ноту» іде до Баєровец

Русиньскій фестіваль гумору «На фіґлярску ноту», якій влони вернул по роках неорґанізуваня, і тот рік буде продолжаний. Oрґанізатором того успішного проєкту, якій полюбил ся Русинам за причыном його ориґінального гумористичного задуманя, є Русиньска Оброда на Словеньску. Того рока на подію довєдна з РОС просят русиньскє село Баєрівці та редакция НН інфо Русин. Фестіваль «На фіґлярску ноту» одбуде ся уж в найблизшу неділю, 30. липця/юлия, і буде проходил в рамках дальшого річника Фестівалю Фольклору Русинів села Баєрівці, якій є орґанізуваний в селі уж од двадцетьох двох років.

Подія зачне ся о 13.30 і буде проходила на обшыри амфітеатру села Баєрівці. Окрем гумористичных выступів і презентациі того, што найліпше в русиньскым гуморі, вказана буде выстава образів зо збіркы старосты села Біловежа – Петра Мікулі, та припоминаны будут русиньска істория, символика і выдатны діячы. Тогорічна едиция фестівалю «На фіґлярску ноту», як кажда з орґанізуваных в 2017 році Русиньском Обродом на Словациі акций, проходит під позначыньом 2017 рока як рока Адольфа Добряньского.

Модератором подіі буде Ігор Латта – долголітній член драматичного колективу Театру Александра Духновича в Пряшові. Фестіваль «На фіґлярску ноту» 2017 є реалізуваний завдякы фінансовій підпорі Уряду Влады Словацкой Песпубликы – Проґрам Культура народностных меншын 2017.