На Лемковині выступує Gammarus stasiuki…

Науковці одкрыли новый ґатунок ракоподібных, якій жыє м.ін. в Низкым Бескіді. Назвали го Gammarus stasiuki, в чест писменника Анджея Стасюка, якій прожыват як раз в єдным з лемківскых сел.

Для никого не єст таємницьом, што знаный писменник Анджей Стасюк вєдно з шефовом Выдавництва Чарне Моніком Шнайдерман жыют в Волівци, селі серединной Лемковины. Незнаным до недвана было, што в поблизкых потоках жыют Gammarus-ы stasiuki.

Новый тип ракоподібных одкрыла ґрупа дослідників з Лодзіньского Університету: Томаш Мамос, Міхал Ґрабовскій і Кжыштоф Яжджевскій вєдно з дослідниками зо словацкых науковых інституций: Зузаном Чампоровом-Затовичовом і Федором Чaмпором. Польскы дослідникы то одданы чытачы книжок і фелєтонів Анджея Стасюка, о чым написали в листі до писменника інформуючым, што в його чест назвали одкрытый ґатунок звіряте.

Так само як Стасюк поділяют любов до Східньой Европы і хотіли, жебы назвиско писменника было упамятнене не лем в літературі, але і в природі реґіону, котрый описує. «Рішыли сме назвати на Вашу чест новый для наукы ґатунок звіряте – ракоподібного, якій жыє в потоках Східніх Карпат в Польщы, Украіні, Румуніі, а тіж в Низкым Бескіді, в котрым мешкате. Одкрыли сме го, науково описали в залученій публикациі, зілюстрували і надали названя Gammarus stasiuki» – подали в листі до писменника.

Інформацийом том поділила ся через соспільны медиі Моніка Шнайдерман, жена писменника і шефова Выдавництва Чарне. «То зворушаюче і незвычайне, што фурт іщы так близко мож одкрыти незнаны істоты. Красный є тот союз наукы з культуром. І тото, што Gammarus-ы stasiuki, як пишут науковці з ЛУ, роздрібняют і обрабляют опале з дерев листя і дают можливіст материі, котра в них є, надале засилити круг жытя» – коментувала на своім профіли в сіти Facebook М. Шнайдерман.

Науковый допис дослідників, в котрым мож чытати цілу специфікацию нового ґатунку, найдете за тым мотузком.