На многая літа, Владыко!

14. серпня припадат ден 88. уродин Його Высопреосвященьства Высокопреосвященнійшого Кыр Адама, Архієпископа Перемышльского і Новосандецкого.

Владыка Адам (Александер Дубец) вродил ся 14. серпня 1926 рока во Фльоринці. В часі II світовой войны вчыл ся в Украіньскій Учытельскій Семінариі в Креници. В 1960 році скінчыл Православну Духовну Семінарию в Варшаві, пак Християньску Теолоґічну Академію.

Рукоположений в 1965 р. Через парудесят років нюс душпастырску опіку над парафіями в Высові на Лемковині і в Кальникові. 30. січня 1983 рока высвячений на вікария Варшавской Єпархіі – єпископа Любліньского, а пак 29. вересня 1983 р. призначений на саноцку катедру, як єпископ реактывуваной по такой 300. роках православной Перемышльско-Новосандецкой Єпархіі. Од 1996 році в ранзі архієпископа.

Перемышльско-новосандецка єпархія, яком кєруют владыка Адам, рахує парудесят парафій і пару тисячів вірных. Його старяньом покликано на Лемковині новы парафіі і збудувано новы церкви і каплиці м.ін. в Ґорлицях, Розділю, Зындранові, Тыляві, Креници, Реґєтові, Ряшові, Білянці, одбудувано церков в Команьчы, покликано мужскій монастыр Покровы Богородиці в Высовій, монастыр св. Кірила і Методия в Уйковицях, Осередок Православной Культуры Елпіс в Ґорлицях, ци Православний Осередок Милосердя Елеос в Ґладышові. Владыка Адам был ініциятором канонізациі о. Максима Сандовича. Был тіж ініциятором печатной діяльности в новосотвореній єпархіі – в Саноку выдаваний є Церковний Календар і часопис Антифон.

В 2010 році владыка Адам был угоноруваний через Украіньску Православну Церков Ордером св. Петра Могылы, в 2011 році президент Украіны Віктор Ющенко угонорувал го Ордером Князя Ярослава Мудрого (V ступени).

Як радийо лем.фм, желаме Вам, Владыко, долгых років жытя в добрым здоровлю і Божой помочы в несіню душпастырской опікы над Лемковином.

НА МНОГЫ ЛІТА, ВЛАДЫКО!