На молодежный табор у Войводині пришли Русины із шестьох держав

В днях 6-го аж 9-го авґуста 2026-го року в Новім Орахові і Бачкій Тополі проходила Стріча русиньской молодежи. Коло 30 молодых Русинів із Словакії, Україны, Чеськой републікы, Румунії, Хорватії і домашньой Сербії были уквартельованы в Домі школярів у Бачкій Тополі, а головный проґрам проходив у Новім Орахові.

Як інформовав портал Радіо-Телевізія Войводина, тот табор про молодых орґанізовала Містна орґанізація Руськой маткы „Орех“ із Нового Орахова, Форум молоды Руськой маткы із підпоров општины Бачка Топола а Націоналного совіту Русинів.

Стріча молодых выросла із ідеї, котра была обговорена на Світовім конґресі Русинів.

Як інформовала аґентура Рутенпрес, в пятніцю в Новім Орахові молоды в Русиньскім домі могли окоштовати русиньскы стравы, виділи улічку 13-го мая, котра сімболізує населованя Русинів із Руського Крестура до Нового Орахова, но посмотрили собі наприклад і містну ґрекокатолицьку церьков.

В тот день вечур мали і културный проґрам в містнім Домі културы, в рамках котрого выступали домашні але і гості, Русины із румуньского Переґу Маре.

В суботу молоды навщівили озеро в Бачкій Тополї, фотбаловый штадіон, і вечур мали на проґрамі шпортовы актівности.  В неділю навщівили етно хыжу в Новім Орахові, по чім одбыло ся неформалне засіданя Світового форуму русиньской молодежи. По нім наслідовали далшы актінвости.