На школі в селі Убля поламала ся стріха під снігом. Шкоды за 65 тісяч

В русиньскім селі Убля, в окресі Снина, в пятніцю поламала ся під снігом стріха на школі. Шкоды суть у вышці 65 тісяч евр. Днесь ся в школі обновлює навчалный процес.

Поламала ся стріха, пукали стіны

Під тяжобов снігу ся поламала в пятніцю стріха на єднім із павілонів містной школы. Медії о тім інформовала старостка села Надежда Сіркова. Школярям ся нич не стало. Навчаня за словами старосткы проходило нормално, но кідь виділи, же зачінать пукати стіна в класах, діти были зо школы евакуованы.

На місце пришли добровольны гасічі, котры ся такой намагали дати зо стріхы сніг гет. Пізніше были загнаны і професіоналны гасічі з Гуменного і Снины.

Сіркова уж в пятніцю інформовала, же на місце буде треба запросити статіка, котрый посмотрить на кондіцію будовы, кідьже окрім стріхы зачали пукати і стіны школы. В понедільок, 16-го януара, были порахованы шкоды на обєкті в цілковій сумі 65 тісяч евр. Маєток быв асекурованый, в припаді потребы бы в рамках гаварійного стану хотіла старостка пожадати і о дотацію з міністерства школства.

Навчаня буде продовжовати

Сіркова про медії повіла, же при рахованю сумы выходили із проєктовой документації. На школі ся буде мусити зробити нова стріха, забеспечіти бетоновый вінець, а буде ся робити і нова фасада, котра є знищена на дакілько місцях. До класів і на ходбу за їй словами не затікать. В понедільок мали школярі директорске вольно, од віторка, 17-го януара, зачінать нормалный навчалный процес. Учіти ся буде лем в тых павілонах, котры не суть пошкоджены, і то аж до часу комплетной реконштрукції школы.

Зареаґовав і Крайняк

На інформацію о школі на своїм фейсбуковім профілі такой в пятніцю зареаґовав і державный секретарь Міністерства школства, наукы, досліджіня і шпорту Словацькой републікы Петро Крайняк.

„По отриманюю інформації о пропаднутю стріхы на школьскім обєкті в русиньскім селі Убля, окр. Снина, єм ся споїв зо старостков села Надеждов Сірковов (так само колеґыньов депутатков у Заступительстві Пряшівского самосправного краю). По телефонічнім розговорі з пані старостков я радый, же не дішло ку зраніням школярів і педаґоґів школы. Робітници школы пополідне превентівно одметали сніг з далшых школьскых обєктів і сітуація є моментално під контрольов, напрік продовжуючому сніжіню. Міністерство школства почекать на вырахованя шкоды і будучій тыждень ся знова споїть з веджіньом села Убля. О сітуації быв інформованый і міністер школства Петер Плавчан.

Веце як 50-річна школа

Основна школа з матерьсков школов в селі Убля є повно орґанізована школа (є там першый і другый ступень основной школы) як єдна з мала на русиньскых селах. Збудована была в році 1960. В сучасности до ній ходить оркім домашніх і 75 школярів з далшых семох сел, кідьже Убля є централным селом долины.

Жрідло фотоґрафії: TASR/HaZZ

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА