На Словакії до Днів европской културной дідовизны залучены і деревяны церькви

Од 11-го септембра аж до 20-го септембра 2015 р. проходять Дні европской културной дідовизны – European Heritage Days. До тых днів залучать ся і Словакія од 1993 року. Подію орґанізує Рада Европы і Европска комісія і проходить у 49-ох державах.

В Словацькій републіці коордінатором події є Здружіня історічных міст і сел на Словакії. Тогорічнов темов Днів европской културной дідовизны є „Бісіда памяток“. Як інформовав денник Korzár Рудолф Греньо за Пряшівску ґрекокатолицьку архієпархію, цільов днів є сприступнити людям културны памяткы, ці вже тоты, котры суть нормално заперты, або котры служать на іншы заміры. На северовыході Словакії люди можуть посмотрити собі дідовизну Русинів – унікатны деревяны церькви.

З деревяных церьквей буде мож до 20-го септембра 2015 року видіти наприклад храмы в Трочанох, Яловій, Калній Розтоці, Ладомировій, Доброславі ці Лукові – Венеції. Ближшы інформації можете найти на сайті Днів европской културной дідовизны.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА