На Словакії ся самосписало 86 процент жытелів. Продовжує асістоване списованя

До електронічного списованя жытелів на Словакії ся найвеце людей запоїло такой в першый день. 15-го фебруара, коли списованя зачало, схосновало можливость самосписаня 651 162 жытелів Словакії.

На пресконференції, котра одбыла ся у віторок 6-го апріля 2021, о тім інформовали представителі Штатістічного уряду Словацькой републікы. За даныма, котры здобыли з електронічного списованя, ся самосписало 4 884 007 людей, што представлює 86 процент жытелів Словакії.

Резултаты перекрочіли очекованя

Председа Шатітістічного уряду Александер Баллек підкреслив резултаты. За його словами перше електронічне списованя „перекрочіло очекованя“. Звернув при тім увагу, же штатісты очековали участь в онлайн списованю на уровни 70-ох процент.

Шеф Штатістічного уряду підчеркнув роботу і асістенцію самосправ, медій і вшыткых, котры на списованю співпрацовали.

Директорка Секції соціалных штатістік і демоґрафії Штатістічного уряду а фахова ґарантка списованя Людмила Іванчікова звернула на пресконференції увагу на то, же денне середнє чісло людей, котры ся самосписали, было 95 тісяч.

За добрыма резултатами видить реално наставлену концепцію і выходовы пункты інтеґрованого списованя, і высшу міру помочі в родинах, де помагали старшым членам, котры не мають приступ ку онлайн формі списованя.

Подля часточных резултатів до списованя веце залучіли ся жены як мужи, актівніше было населіня в містах як на селах.

Выход чекать і на асістенцію

Найактівнішы были в електронічнім списованю в Жіліньскім краю, де ся самосписало 92 процент жытелів.

На другім місці є Тренчаньскый край із 90-ма процентами, пак іде Тырнавскый, Братіславскый, Нітраньскый і Баньскобыстріцькый край, котрый має 85-процентну участь на самосписованю.

Найгірше суть на тім краї на выході Словакії. В Пряшівскім краю выповнило електронічный формуларь 83 процент жытелів, найменше списаных было в Кошыцькім краю, де была участь лем 79 процент.

Електронічне списованя зачало 15-го фебруара і закінчіло ся 31-го марца. Теперь продовжує асістоване списованя, котре мусить быти закінчене до 31-го октобра. В самосправах буде асістоване списованя проходити шість тыжднів і о термінах буде Штатістічный уряд допереду інформовати. Якраз в Пряшівскім і Кошыцькім самосправнім краю ся очекує, же чісла участных ся звекшать по асістованім списованю, кедьже на выході Словакії є много сел, де є старше населіня, де не є інтернетова інфраштруктура, ці де суть марґіналізованы ромскы комуніты.

Першы оцінкы резултатів бы мали быти публікованы кінцьом календарьного року. Списованя жытелів опередило списованя домів і квартелів, котре проходило од 1-го юна 2020-го до 12-го фебруара 2021-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА