Найліпшых пят і «Бескід без кіту»

Книжка «Бескід без кіту. Зима» нашла ся серед пятьох номінуваных до Нагороды ім. Фердинанда Вспанялого за найліпшу книжку для діти. Спектакль «Бескід без кіту» запрезентуют на торжественній ґали вручаня нарогоды.

Нагорода ім. Фердинанда Вспанялого то выріжніня для найліпшой дітячой книжкы минулого рока, што признают на Фестівали Літературы для Діти. Тот як раз зачне ся в Кракові о тыжден, 16. листопада/новембра, і потырват до 20. листопада/новембра.

Серед пятьох найліпшых книжок нашла ся дальша част істориі осадженой на Лемковині авторства Мариі Стшелецкой пн. «Бескід без кіту. Зима». В попередніх роках книжка «Бескід без кіту» здобыла уж головну нагороду.

Приводит давны смакы, запахы, зворушыня

«’Бескід без кіту. Зима’ то книжка, котра з пошаном і вражливістю отверат двері до вельоверствовой істориі Бескіду, привертат на тоту землю єй полноправных жытелів – Лемків з іх традициями, вірінями, сумлінні одтвореном штоденністю» – чытаме в лявдациі Аґнєшкы Совіньской выголошеній вчас ґалі Літературной Нагороды м. Варшава.

«Выселены вчас тзв. акциі ’Вісла’, завдякы Мариі Стшелецкій вертают на свою землю, а іх хыжы выполнюют ся запахами, піснями, одголосами штоденного жытя, в каменьоломах чути стуканя молотків камінярів, на опустошеных днес церквисках звучат дзвоны. А до велийного стола зас запрашают планетників, волкы, медведі. Світ представленый в книжці Мариі Стшелецкой одмітує антропоцентричну перспективу – бесідує до нас голосами люди, звірят, рослин, річы. Родит тугу за світом, в котрым каждый з голосів єст рівноцінный» – чытаме в лявдациі.

З Устя Руского до Містa Літературы UNESCO

Вердикт на найліпшу книжку для діти оголосят 20. листопада/новембра вчас торжественной ґалі, котра буде закінчыньом тырваючого пят днів в Кракові Фестівалю Літературы для Діти. Лавреаты традицийні отримают статю Фердинанда Вспанялого та чек на 20 тис. зл уфундуваный через Краків Місто Літературы UNESCO, котрого оператором єст Краківскє Фестівальове Бюро.

Ґали товаришыл буде спектакль «Бескід без кіту» в режысериі Монікы Бабулі і Мариі Стшелецкой на мотивах книжкы, котра выграла в конкурсі перед двома роками. Молодіж з Устя Руского приведе таємничый і красный світ Низкого Бескіду 60. років ХХ ст.

Нагорода ім. Фердинанда Вспанялого

Нагорода ім. Фердинанда Вспанялого вручана єст од 2016 рока вчас фіналовой ґалі Фестівалю Літературы для Діти в Кракові. Єй назва односит ся до псячого героя, котрого барз люблят молоды чытачы – його автором в 1963 р. был Людвік Єжы Керн. Цілю нагороды єст промоция літературы і єй творців – авторів і ілюстраторів з Польщы.

О дальшых номінуваных до тогорічной нагороды чытайте за тым мотузком.