Од понеділька, 18. квітня/апріля т.р., мож зголошувати ся до участи в варштатах народного взірництва на полотні, якы проходити будут в Мазярскій Загороді в Лоси.
Варштаты інспіруваны сут традицийным взірництвом ручні друкуваных полотен, з котрых шыты были м.ін. кабаты, запаскы, або хусты. Вчас занять, при звуках лемківской музыкы – як реклямуют орґанізаторы, буде мож докладні призріти ся ґрафічным елементам народных взорів, а то крапкы, крискы, ци леніі.
При схоснуваню найбарже архаічного знаку – крапкы, буде мож выдумати свій індивідуальний взір на кавальци полотна. Окрем того, хоснуваны будут примітивны, ориґінальны нарядя (напр. стемпель з набитыма цвяками) і ограничену кольористику для ліпшого зобразуваня обставин, в якых нашы бабы прикрашали полотна. Простом технолоґійом вказане буде, як сотворити ориґінальний взір. Зміняючы лем велькіст, напрям, ритм, або кольор знаку, мож было зробити вшелеякы взоры.
Вчас занять участникы познают ріжны способы старого друкуваня полотен, а з задрукуваных нима полотен буде зрыхтуваний свого рода катальоґ друків в виді спільного коляжу. Пак, каждий з участників буде міг сой забрати свій задрукуваний кавалец полотна.
Варштаты будут проходити од квітня до жолтня, термін буде рішаний по телефонічній резервациі. Занятя (час іх тырваня то коло 1,5 год.) перезначены сут для шкільной молодежы і діти. Зголошувати мож ся телефонічні: 18 35 34 363, або е-майльом: zagroda.maziarska@gmail.com.
Орґанізатором варштатів єст Мазярска Загорода в Лоси, одділ Музею Дворы Карвациянів і Ґлядышів в Ґорлицях.
фот. Р. Райнфус, Карпатскій Світ Бойків і Лемків, стр. 29.
Коментарі