В понедільок 3-го юлія 2017-го року проходили в Пресцентрі Уряду влады Словацькой републікы вольбы до Выбору про народностны меншыны і етнічны ґрупы, кідьже закінчів ся трирічный функчный період, котрый дотуляв ся векшыны членів выбору про народностны меншыны і їх заступників. На цілы вольбы дозерала комісія із семох членів, рахованя голосів было за участи нотаря.
Орґанізації народностных меншын ся могли писемно зареґістровати і оголосити волителів на волебну громаду, як і пропоновати кандідатів на членів выбору і кандідатів на заступників членів у выборі в згоді із Вызвов на реґістрацію кандідачных списків і вызвов на реґістрацію народностных орґанізацій доказательно анґажуючіх ся в области підоры, всокочіня і розвитку ідентічности і културы членів народностны меншын до 23-го юнія 2017-го року.
Русиньска народностна меншына має в меншыновім выборі двох рядных членів з єдным голосом при голосованю і двох заступників, котры можуть прийти на засіданя намісто рядного члена, котрый не годен взяти участь. В попереднім періоді членами Выбору про народностны меншыны і етнічны ґрупы за русиньску народностну меншыну были Ян Липиньскый і Мілан Піліп, котрый быв рядным членом аж од децембра 2015-го року, по абдікації Мілана Мнягончака з функції. Заступниками были Петро Медвідь і Владимір Мінчіч. Мінчіч быв заступником так само аж од децембра 2015-го року, коли в позіції заступника вычеряв Мілана Піліпа, якый наступив за рядного члена.
О право голосовати приголосило ся за русиньску народностну меншыну 16 орґанізацій. За рядных членів были пропонованы Мілан Піліп, Петро Медвідь, Мартін Караш і Люба Кральова. За заступників приголошены орґанізації пропоновали Яна Липиньского, Мілоша Стрончека і Марію Ґоцову.
Уряд влады вечур по понедільковім голосованю публіковав резултаты і мена нововзволеных членів і заступників про окремы народностны меншыны, вызнаны на Словакії, з вынятком україньской меншыны, кідьже у той меншыны не были платны голосы і так буде мусити голосовати ся в рамках Українців іщі раз.
Новозволеныма преставителями Русинів Словакії, котры здобыли найвеце голосів, на слідуючій період трьох років у Выборі про народностны меншыны і етнічны ґрупы суть Мілан Піліп і Петро Медвідь, як рядны членове і їх заступниками будуть Ян Липиньскый і Мілош Стрончек.
Выбор про народностны меншыны і етнічны ґрупы є сталым фаховым орґаном Рады влады Словацькой републікы про людьскы права, народностны меншыны і родовну рівность про вопросы дотуляючі ся народностных меншын і етнічных ґруп і їх членів і про область імплементації Европской харты реґіоналных або меншыновых языків в смыслі Рамкового договору на охорону народностных меншын. Повнить функцію конзултатівного орґану у справах участи членів народностных меншын і етнічных ґруп на рішіню справ дотуляючіх ся народностных меншын і етнічных ґруп.
Зволеных кандідатів за окремы меншыны офіціално выменує за членів і заступників членів Выбору про народностны меншыны і етнічны ґрупы уповномоченый влады Словацькой републікы про народностны меншыны і етнічны ґрупы і єдночасно председа споминаного выбору Ласло Буковскый на вынятковім засіданю выбру в новім складі, котре є наплановане на 18-го юлія 2017-го року.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА