«Слово» – Неділя всіх святых – неділя, 9.00 год.

Неділя всіх святых. В нашім літурґічнім календарю по Неділі Сошествія Святого Духа. Покликаня ку святости не є лем про даякых выбраных, але є то позваня про каждого хто увірив в Хріста. Святость не є в творіню чудесных діл, ці в даякых надзвычайных дарах про выбраных Божых. А є то денно-денні жыти Євангеліє. Ісус Хрістос нам давать в днешнім слові дакілько крітерій ку святости: признавати ся ку Хрістови в каждій сітуації жывота. Не лем словами, але нашыма ділами і нашыма думками. Одречі ся старого чоловіка з його пожадливостями, брати свій крест а іти за Хрістом. То є преносити вшыткы вонкашні тягары – трапліня, хвороты, біды, пронаслідованя, высміваня за імя Хріста. А тыж крест означує і внутрішні покушіня світа, тіла і діявола, котры мають за ціль одорвати нас од споїна з Хрістом. То є внутріїній духовный бой. Так коли днесь маєме перед очами то бесчіселне множество святых, смотьме на тоты світлы приклады і старайме ся через рады, котры нам Хрістос указує в днешнім євангелію, іти дорогов святости.

В неділю, 26-го червця/юна 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26-го червця/юна о 12.00, 15.00, 20.00 год. і 27-го червця/юна о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: «Кланяня Агнцю» (братя ван Ейк), 2-я пол. XV ст. Жрідло Wikipedia.