Неодолга зимове змаганя з Лемковином

Низкій Бескід притігат о каждій порі рока. І о каждій порі захоплює чымси інчым. Краєвид остає фурт тот сам, ци то під снігом, ци в горячым сонци – придорожны капличкы і кресты, церкви, видоковы верхы і буковы лісы. Того рока орґанізаторы Лемковина Вінтер Трейль зас вкажут го в зимовій сценериі.

О три тижні, 22. лютого/фебруара 2020 р., выстартує друга едиция змагань в літаню по горах і долинах Лемковины. Популярніст осінніх змагань (Лемковина Ультра Трейль) вказала, што треба дальшых можливости, жебы міряти ся з горами Низкого Бескіду та зо самым собом.

Базом змагань, подібні як влони, буде Івонич, єдно з найстаршых польскых курортів. Участникы акциі выстартуют і закінчат змаганя в самым серци курорту – на івоницкым Пляци Дітля, доокола котрого находит ся деревяна забудова.

Літачы ривалізувати будут на двох трасах. Долша має 35 км, веде од Івонича через верх Приміркы, з котрого видно Низкій Бескід, а при добрій видочности мож дозріти ся аж і Татр. Дальше на трасі є сусідній курорт – Рыманів, Балутянка і Завадка з лемківскыма церквами та гора Цергова, на котру треба выйти, жебы вернути до Івонича.

Коротша траса чыслит 15 км, експлорує обшыр медже курортами Івоничом а Рымановом, в тым споминаны Приміркы, але і мало знану Жабячу Гору.

На стартовых списках находит ся уж більше як 500 участників з цілой Польщы. Деталі і записы найдете гев.

Фот. Кароліна Кравчык