Голосник

Нова книжка о Свіднику і його околіці

Свідницька безпрофітова орґанізація Dukla Destination недавно выдала нову публікацю під назвов Svidník (Свідник). Книжка презентує чаро і красу реґіону під Дукльов. Інформовала о тім ґазета Dukla. Публікація, котра має по словацькы і по анґліцькы писаны тексты, є повна унікатных фотоґрафій, котры захоплюють красы краю.

„Dukla Destination довгодобо має намагу пропаґовати край під Дукльов. Місто Свідник і його околіця є повне унікатных памяток. Зато нас міцно тішыть выданя той книжной публікації, котра захоплює їх вынятковость,“ повіла директорка орґанізації, яка книжку выдала Ева Гірчкова, котра вірить, же обсяг книжкы людей заінтересує аж так, же вырішать навщівити тот реґіон.

Книжку оцінила і пріматорка Свідника Марцела Іванчова, котра єй „вовела до жывота“ на святочній презентації. „Як пріматорка окресного міста ся барз тішу, же маме шумну книжку о нашім місті і реґіоні. Красна є нелем дізайном, але і якостным обсягом,“ повіла Іванчова.

Нова книжка є розділена на дакілько капітол. Найдете в ній факты з історії, обявите памяткы реґіону, стрітнете ся і з природныма скарбами, котры суть в тім краю. Хоць, як сьме спомянули, книжка має тексты по словацькы і по анґліцькы, є головно о фотоґрафіях. „Є то фотосупроводник, котрый має поводити чітателя, або навщівника краю, по нашім реґіоні,“ повіла Гірчкова.

Книжка захоплює на знимках і деревяны русиньскы церькви, котры ся свідницькій долині находять, а творцьове не забыли ани на Путь войновых героїв, кедьже Дукля є знама головно як теріторія, де одбыли ся єдны із найтяжшых боїв почас Другой світовой войны.

На сторінках новой публікації ся мож познакомити і містнов културов, традіціями і звыками того русиньско-шарішского реґіону. Тому є присвячена окрема капітола. „Тота капітола має вказати жывот нашых людей. Одказує на окремы звыкы, котры сьме перевзяли од своїх предків,“ додала про ґазету Dukla Гірчкова.

Жрідло фотоґрафій: Dukla Destination.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі