Нова моноґрафія Елейн Русинко розповідать історію матери Енді Варгола

Выдавательство Піттсбурьской універзіты на новембер 2024-го року приготовлює выданя новой публікації в рамках серії Російскы і выходоевропскы штудії. Авторков є емерітна асоціована професорка на Маріландьскій універзіті в Балтіморі – Елейн Русинко, котра довгодобо занимать ся досліджаньом історії русиньской літературы.

Вже понад десять років Елейн Русинко занимать ся і особов Юлії Вархолы – матери Енді Варгола, штудує вшыткы артефакты з ньов повязаны в архівах Варголового музея в Піттсбурзі, чого выслідком має быти приготовльована моноґрафія з назвов Матірь Енді Варгола. Жена за художником.

„Юліа Вархола сама о собі была художницьов,“ пише ку книжці Богдан Горбаль, куратор Славяньскых і выходоевропскых збірок Ню-Йорьской публічной бібліотекы. „Русинко зручно і чутливо розповідать їй жывотну історію од Миковой через Піттсбурґ аж по Ню Йорк, причім дає вываженый погляд, котрый спохыбнює конвечный портрет.“

Карпаторусиньска саґа

І кедь вже тоты, котры писали біоґрафії Варгола, давно признали, же його мати мала вызначный вплив на його жывот і уменя, історія Юлії Вархолы дотеперь не была розповіджена, пише ся в антоації приготовльованой публікації.

„Ниґда не мала можливость розвивати свої значны умелецькы таленты. Намісто того працовала і жертвовала себе, жебы їй сын годен быв іти за своїма снами, причім помогла формовати уменя і особность Енді Варгола.“

Юлія Вархола наслідовала свого сына і до Ню-Йорку, де з ним жыла майже 20 років і была залучена до його особного і художного жывота. Была позната як „матірь Енді Варгола“, а так ся і підписовала на своїх властных рисунках.

„Елейн Русинко приносить саґу карпаторусиньского жывота в першій половині двадцятого столітя, як в Старім краю, так і в еміґрації, з окремым акцентом на долю жен. На основі дотеперь непробаданых архівів і обявліня новых детайлів приносить новый погляд на приселенцьку скушеность родины Вархоловых, котра формовала Енді Варгола як особность і художника,“ пише Патріція Крафчік із Еверґріньской державной універзіты.

Дотеперь непублікованый матеріал

Нова моноґрафія Елейн Русинко Матірь Енді Варгола. Жена за художником бадать дотеперь непублікованый матеріал включно по русиньскы писаной корешпондецнії і відеозаписів, і приносить глубокый погляд на тяжык жывот Юлії Вархолы.

Русинко слідує жывот матери краля поп-арту „од людовых звычаїв із їй Старого краю через смоґ промыслового Піттсбурґа і ґрявк авантґардного Ню-Йорку. Русинко одкрывать вплив Юліїной карпаторусиньской културы, ґрекокатолицького віроісповіданя і традічного світопогляду на їй ултрамодерного сына, тіпічного америцького художника. Тото детайлне баданя світа Вархоловой родины уможнює ліпше порозуміня Енді і Юлії, причім єдночасно освітлює шыршы соціалны і културы вопросы, котры їх формовали і овпливньовали.“