Голосник

Нова платня Оркєстры св. Миколая – «Моды і Коды»

Оркєстра св. Миколая то ансамбль добрі знаний лемківскому світу. По шестьох роках перервы, ґрупа з Люблина выдає нову платню пн. Моды і Коды, котра істо обдарує нас добром славяньском музыком. Офіцияльна премєра платні є передвиджена на заран, т.є. 11. марця.

Моды і Коды то 10 платня Микoлаів, хоц треба памятати, же капеля брала тіж участ в інчых проєктах. Анамбль над новым метериялом зачал роботу в 2013 році, што неодолга почуєме в виді 12 творів, інспіруваных польском музычном традицийом. Співанкы сут по части получыньом формы знаной з фолькльорных ансамблів та навязнуют до манєр і граня днешніх стилізуваных аранжаций.

Як чытаме на офіцияльным сайті Оркєстры св. Миколая, наголовковы моды мож розуміти на два способы. Перший – як штоси модного, гев: модны музычны стилі. Другє значыя односит ся  до модифікациі, котра в скорочыню може быти брана як слово мод (в компутеровых грах – то поправка, придаюча ій напр. новы функциі). Поясніня кодів треба глядати в ослуханых музычных кодах: гітах музычной естрады і мельодеклямациі – днес найшумнійше знаных в культурі гіп-гопу. Цілю проєкту є вказаня, же мож зачеркнути вельо з тзв. музычной традициі, же каждий період выконуваня фольклору лишыл в істориі свій цікавий слід (код). По части сеса платня є довершыньом долголітнього граня Оркєстры св. Миколая, котра фурт глядала новых контекстів захопліня традицийном музыком.

Хоц на платни Моды і Коды неє творів в лемківскым языку, рекомендуєме по ню сягнути. Можете тіж одсвіжыти в памяти старшы проєкты Миколаів – нашы акценты найдете на печатаным в 2007 році, вынятковым альбомі, посвяченым лем творам співаным в русиньскым языку. Lem-agination то цікава пропозиция вірного одтворіня народной музыкы з Лемковины. Ґрупа заграла творы на інструментах, котры дашнійше были хоснуваны лемківскым/русиньскыма гудаками. З тым – традицийні заграным – материялом ґрупа концертувала на вельох русиньскых подіях, м.ін. на Лемківскій Ватрі на Чужыні в Михалові.

Долов єден з творів новой платні Моды і Коды пн. Госадина:

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі