Новий предстоятель вроцлавско-щеціньской єпархіі ПАПЦ

Рішыньом Святого Собору Єпископів Польской Автокефальной Православной Церкви, якого засіданя прошло в віторок, 16. мая  2017 р., на нового предстоятеля вроцлавско-щеціньской єпархіі ПАПЦ поклинано владыку сімятицкого Юрия, якого тым самым звільнено з функциі вікария в варшавско-більскій єпархіі.

В взязку зо смертю архієпископа Єреміі, тымчасовы обовязкы ординария вроцлавско-щеціньской єпархіі выполнял владыка супрашльскій Григорий, якій самособом рішыньом Собору был в віторок з той функциі знятий. Дальше рішено, што інтронізация нового владыкы на катедру вроцлавскых єпископів, одбуде ся в неділю 18. червця/юнія т.р. в соборі Рождества Пресвятой Богородиці во Вроцлаві.

Новий предстоятель вроцлавско-щеціньской єпархіі народил ся 4. серпня/авґуста 1974 р. в Білымстоку як Мариюш Паньковскій. 31. мая 1989 р. склал на рукы архієпископа Савы прошыня на монаший постриг. Владыка направил го до монастыря в Супрашли як послушника. Парарельно Мариюш Паньковскій піднял науку в Православній Духовній Семінариі в Варшаві. В грудни/децембрі 1993 р. был пострижений в рясофор. В тым же році зачал студиі на Християньскій Богословскій Академіі, а дальше продолжал науку в Нацийональным Aфіньскым Університеті. Перед зачатьом студий, перебывал рік в монастырі Параклет поблизко Афін.

1. січня/януара 1995 р. архієпископопом білостоцкым і ґданьскым Савом был рукоположений на діякона. О пару місяців, 10. вересня/септембра 1998 р., в супрашльскым монастырі принял малу схіму і принял мено Юрий (Георгій), в чест преподобного Георгія Хозевита. 15. жолтня/октобра 1998 р. патриярхом Константинопольскым Варфоломійом в білостоцкым храмі Гаґія Софія был рукоположений во єромонаха. На владыку был покликаний Святым Собором 28. листопада/новембра 2006 р. О три місяці, 28. січня/януара 2007 рока, в катедральным соборі в Варшаві одбыла ся його хіротонія во єпископа сімятицкого, вікария варшавско-більской єпархіі.

В липци 2010 р. на надзвычайным Соборі ПАПЦ была його кандидатура зголошена на Православного Ординария Польского Войска, в місце траґічні погыбшого архієпископа Мирона (згынул 10. квітня/апріля 2010 рока в смоленьскій катастрофі). Дальше, был затверджений Міністром Нацийональной Обороны.

Владыка Юрий є професором теолоґічных наук. Выкладат на Християньскій Богословскій Академіі в Варшаві, де попри тым выполнят фукцию проректора. В звязку з выбором владыкы на престоятеля вроцлавско-щеціньской єпархіі, Митрополита Сава піднюс єпископа Юрия до ранґы архієпископа.

фот: Вікіпедия