В Калинові припомянули собі 82-гу річніцю ослободжіня

В русиньскім Калинові, Меджілабірьского окресу, собі в суботу 26-го септембра 2026-го року припомянули 82-гу річніцю ослободжіня села і 81-шу річніцю закінчіня Другой світовой войны.

Як інформовала аґентура TASR, на святкованях в Калинові, котрый быв першым ослободженым селом в рамках цілой бывшой Чехословакії, тот рік взяли участь і двоми верьховны конштітучны чіновникы Словацькой републікы – презідент Петер Пеллеґріні, і председа Народной рады Словацькой републікы Ріхард Раші.

„Была то перемога, котра ся родила барз болістно і тяжко,“ повів на свткованях презідент Пеллеґріні.

„Днешній день є про нас принагодов выразити вдяку героям, котры тоту перемогу про нас выбойовали, оддати честь тым, котры за нашу слободу і мір положыли свої жывоты. Подяковати ся вшыткым, котры поставили ся із збройов в руці проти фашістічных окупантів. А так само подяковати статечным людям, котры помагали без огляду на то, яка їм грозила небезпека,“ продовжовав презідент.

Пеллеґріні спомянув і войну на Україні. „Скоріше, як тоты раны стигли ся загоїти, притисла нас реалность із терьпкостьов конштатовати, же войновы страхы і бруталности діють ся і днесь. Докінця в сусідній країні, недалеко місця, на котрім ся стрічаме теперь вєдно. Нажаль, 21-ше столітя знова приносить промарнены людьскы долі і жывоты,“ підкреслив.

Председа парламенту Раші припомянув, же слобода в Калинові не пришла задарьмо. „Принесли єй вояци, головно Червеной армії, котры бойовали далеко од своїх домів, і многы з них вже ниґда не вернули ку своїм родинам і ку своїм близкым. Вшыткым, котры бойовали проти фашізма, неслободы і утискованя, і котры за нашу слободу положыли свої жывоты, належыть наша почливость і вдяка. Нелем днесь, але навсе.“

На значіня сохраніня історічной памяти і ціну міру звернув увагу і староста села Калинів Іван Сивак. „Днешня річніця не є лем споминов на історію, але передовшыткым мементо про сучасноть. В часі, коли світ коло нас знова рішыть непокої, нам Калинів припоминать, як барз тонкый є мір, і яка цінна є солідарность людей, порозуміня і почливость єден до другого,“ повів староста.

В рамках проґраму была і задушна літурґія в містнім ґрекокатолицькім храмі а панахіда за павшых вояків і гражданів. Святочно перелетіла над селом авіачна техніка Воздушных сил Озброєных сил Словацькой републікы, одбыло ся і пєтне кладжіня вінців.  На події выступила Честна сторож презідента СР і Воєньска музика Баньска Быстріця.

Фото: FB/Peter Pellegrini.