Новий сайт православной парафіі в Самбожу

Як заявляли сме за тым мотузком, православна громада зо села Самбож на чужыні рішыла побудувати нову церков, понеже стара каплиця, находяча ся в понімецкій забудові, єст за мала, жебы помістити вшыткых парафіян. Другом головном причыном, котра довела до скорых прац, звязаных з будовом храму, єст барз злий технічний стан старой каплиці.

18. лицпя т.р., в Самбожу посвячено пляц під будову церкви. Од тамтого моменту парафіянам повело ся уж выляти фундаменты та потягнути кус до горы стіны. На жаль, рахуюча пару родин православна громада, не єст в силі сама покрыти вшыткы кошты, звязаных з будовом храму. Зато кєд лем мате дяку сперти вірных в іх труді, можете посылати добровільны даткы на сее банкове конто: 84 1090 2590 0000 0001 3017 3940, Parafia Prawosławna św. Paraskiewy, Samborz 21, 55-311 Kostomłoty. 

О будові новой церкви на заході Польщы заявляме, понеже невелика самбірска громада то Русины і іх потомкы, котры были в 1947 році выселены з рідной Лемковины. Настоятельом парафіі в Самбожу єст Лемко, о. Ігор Габура. Скорше на богослужыня доізджал інчий лемківскій священник – о. Любомир Воргач з Ліґниці. Покровительком парафіі од самого початку єст Св. Великомучениця Параскєва, з той причыны, же векшіст парафіян то выселенці з лемківского села Чырна, де находила ся церков під такым самым вознесіньом. Перша Божеска Літургія в Самбожу была одправлена 7. квітня 1954 р. Служыл єй о. Штефан Бігун, котрий скорше нюс душпастырску опіку на Лемковині в Фльоринці.

За тым мотузком находит ся новий сайт правосланой парафіі св. Параскєвы в Самбожу, де найдете веце інформаций про будову нового храму та богату ґалерию знимок, котра вказує на ступін проведеных до той поры прац.