Новосільскій од кухні

Новосільскій до кінця вересня/септембра 2019 р. єст вказуваный в Варшаві. В рамках выставы під назвом «Новосільскій – маляр – філософ – теолоґ», яка одкрыта была 6. вересня/септембра, в Музею Варшавской Архієпархіі мож видіти сакральны проєкты і ескізы артисты.

Посеред презентуваных прац находят ся і такы, котры дождали ся реалізациі за жытя Юрия Новосільского, і такы проєкты, котры лем были поміщены на папери, николи не довершены, лем задуманы і робочо розписаны.

Працы артисты походят з 1940-1998 рр. Єст то о тілько цікава експозиция, же не вказує лем на заміряны проєкты, ци то скорше, ци пізнійше реалізуваны, або тіж нияк, але так само на выставі сут представлены свобідны запискы автора. Видно вельо записаных чысел, рахунків, тіж ескізів сакральных обєктів. Серед них сут рисункы, гейбы роблены на скоро, східніх храмів, в тым і лемківскых церкви. На выставі обізрите і проєкты ікон і іконостасів, котры родили ся в візиях Новосільского. Декотры з них сут барз детально розписаны, а інчы – як в примірі рисунків обєктів – сут лем загально записаны, в роді нотаткы.

Вартіст варшавской выставы видіти мож і в роботах, котры николи не мали шансы быти зреалізуваны, лем через тото, же на тамтот час (а може і дале днес) были за барз модерныма концепциями, котры не все годны были заакцептувати церковны ци костельны власти. Новосільскій часто творил поза канонами, котры в східній церкви грают важну ролю. Так тіж проєкты ікон, іконостасів не все были акцептуваны, смотрячы з перспективы традицийных канонів іконописаня. Проєкты вказуваны в Варшаві представляют одкрыту візию сакрального кумшту, котра фурт може родити чудуваня або против.

Речена експозция была першый раз вказувана в лютым/фебурарі 2019 р. як завершаюча симпозию під такым самым наголовком, што орґанізувана была Супрашльском Академійом і Фундацийом OIKONOMOS. Выстава товаришыла так само промоциі послідньой книжкы др Кристины Черні під наголовком «Новосільскій – сакральна штука. Підляша, Вармія, Мазуры, Люблин», яка єст такой продолжыньом першого тому, в котрым представлена была творчіст артисты на обшыри Малопольщы.

Роботы Ю. Новосільского мож обзерати до 29. вересня/септембра 2019 р. Музей Варшавской Архієпархіі одкрытый єст од віторка до пятниці в год. 12.00-16.00. Вступне то 10 зл (6 зл зо знижком).