Новосільского передуманя. Конференция на Варшавскым Університеті

Юрий Новосільскій был не лем артистом, але тіж філософом, чловеком, якій дуже присвятил роздумам на тему окружаючого го світа. В будучым тыжни, в середу, 29. мая 2019 р., пройде на Варшавскым Університеті конференция нт. його філософічных передумань і підходу до вшелеякых аспектів богословія.

Подію орґанізує Комісия Speculum Byzantinum Выділу «Artes Liberales» Варшавского Університету. Наголовок конференциі з польского языка мож переводити як «Новосільскій – передуманя». На конференцию просит римокатолицкій варшавскій єпископ-помічник др габ. Михал Яноха. Духовний на конференциі, яка зачне ся о 10.00 год. в будинку ВАЛ УВ, выголосит вводне слово.

Конференция буде мала меджеконфесийный характер, возмут в ней участ представникы ріжных середовиск. З доповідю на тему теолоґіі Новосільского выступит православный священник о. др Генрик Папроцкій. То православный теолоґ і тлумач літургічных текстів на польскій язык, працівник Кафедры Православной Теолоґіі Університету в Білымстоку, як тіж парох польскоязычной православной парохіі в Варшаві. Выступит так само біоґрафка Новосільского, др Кристина Черні з Кракова. Выголосит реферат пн. «Материя і тіло в думках Юрия Новосільского». Єдным з єй значучых творів єст біоґрафія артисты «Мышпергач в святыни. Біоґрафія Юрия Новосільского», за котру в 2012 р. оцінено єй нагородом літературного місячника «Новы книжкы». Посліднім часом выпустила албьом «Новосільскій – сакральна штука. Підляша, Вармія, Мазуры, Люблин».

Окрем реченых прелеґентів, в конференциі выступлят дальшы дослідникы творчости і жытя краківского іконописця, якого рід з лемківской Одреховы. Являт ся темы православя і літургіі як моделю штукы в думках Новосільского, ци темы іконы в передуманях і творчости Юрия Новосільского. Медже поєдныма выступлінями передвиджены сут дискусийны панелі.