О Бісы є інтерес театралных фестівалів

О пєсу нашого Театру Александра Духновіча (ТАД) Бісы, котра выникла на основі роману Фйодора Михаіловіча Достоєвского і театер єй одпремєровав як свою другу премєру в театралній сезоні 2016/2017 в децембрі минулого року, проявлюють інтерес театралны фестівалы на Словакії.

В місяці юній 2017-го року наш єдиный русиньскый професіоналный театер на світі выступав із тов пєсов в рамках театралного фестівалу під назвов Dotyky a spojenia в Мартіні. Тот фестівал, котрый того року проходив уже 13-ый раз, є найвекшов і найрепрезентатівнішов проглядков театрів, котры діють на Словакії. Фестівал представлює актуалну творчость головно професіоналных драматічных театрів і проходить в просторах Словацького коморного театру Мартін і в уліцях міста.

Теперь ся ТАД вкаже 24-го септембра в Нітрі, де буде з Бісами выступати в рамках міджінародного театралного фестівалу Divadelná Nitra. Театер пєсу одограть в Штудію Театру Андрея Баґара.

Театралный фестівал Divadelná Nitra є єднов із найвызначнішых міджінародных подій в области културы на Словакії. Єдночасно є решпектованов подійов в европскім контексті. Проходить од осени 1992-го року все кінцьом септембра в Нітрі, котру має і в назві фестівалу. Того року одбуде ся фестівал од 22-го до 26-го септембра.

Divadelná Nitra є выберовов неконкурзнов переглядков найліпшого европского, передовшыткым драматічного театру, котра є приступна і про танечный, музичный ці ляльковый, припадно вытварный театер. Divadelná Nitra глядать нетрадічны, іноватівны і іншпіратівны сценічны творы, познакомлює з новыма тенденціями і з новыма менами творців, і обсягує богатый супроводный і робочій проґрам. Так само дає простор іншым сортам уменя і презентації реґіоналных културных актівностей. Почас свого існованя на фестівалі представили ся дотеперь пєсы із 31 держав світа.

Фестівал проґрамово присвячать ся неформалній освіті і роботі з публіков. Атмосферу одкрытости, свободы і плодному черяню поглядів оцінюють головно молоды люди, котры суть цільовов ґрупов фестівалу. Divadelná Nitra функціонує і як вызначна платформа културного черяня в рамках Европы, головно міджі Выходом і Западом. Про многы европскы державы значіть фестівал часто єдину можливость презентації їх театралного уменя на Словакії.

І того року окрім театрів зо Словакії буде мож в рамках головного проґраму видіти пєсы театрів із Чеськой републікы, Споєных штатів Америкы, Ґреції, Словенії ці Белґії. Нас тішыть, же на фестівалі зазвучіть окрім іншых і наш, русиньскый язык.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА