В Люблині 7. лютого/фебруара пройде авторска стріча з др Евом Буковском-Марчак та др Анном Вільк. Авторкы запрезентуют своі книжкы: «Приятелі, камараты, ворогы? Реляциі медже польскыма, жыдівскыма і украіньскыма студентами Університету Яна Казімєжа во Львові в меджевоєнным періоді (1918-1939)» та «Лемкы. Медже інтеґрацийом а розбитьом (1918-1989)».
О Лемках
Публикация «Лемкы. Медже інтеґрацийом а розбитьом (1918-1989)» др Анны Вільк тыкат політичной істориі Лемків в Польщы. Представлят історию соспільности на фоні процесу выділяня ся ґруповой спійности, а тіж гляданя достоменности в ситуациі украіньско-польскых змагань во влучыню Лемків до свойой спільноты. Книжка др Анны Вільк описує історичны процесы і найважнійшы подіі, котры влияли на розвиток ґрупы, жебы вкінци довести до дезінтеґрациі і розселіня Лемків.
Др Анна Вільк єст історичком, абсольвентком Католицкого Любельского Університету. Занимат ся історийом нацийональных меншын і проблемами нацийональной політикы власти Польской Республикы. Маґістерку і докторску розправу написала о ситуациі Лемків, были то темы: «Культурно-соспільна дезінтеґрация Лемків на обшыри новосандецкого повіту 1945-1952» і «Істория Лемків 1918-1989».
О односинах
Книжка «Приятелі, камараты, ворогы? Реляциі медже польскыма, жыдівскыма і украіньскыма студентами Університету Яна Казімєжа во Львові в меджевоєнным періоді (1918-1939)» др Евы Буковской-Марчак є пробом одповіди на звіданя о реляциі студентів наголовковой учельні в меджевоєнным періоді. В роках 1918-1939 на высшых учельнях Львова студиювали представникы ріжных наций і віроісповідань. Доходило медже нима до конфліктів. Часто рекрутуваны студенты походили з нацийоналистиных середовиск. Чом украіньска молодіж ліпше споминала Львівскій Університет з австро-угорскых часів як Університет Яна Казімєжа? Чом на обшыри учельни доходило до кырвавых атаків на слухачів жыдівского походжыня? Чом справці не были караны? То лем част зо звідянь, котры авторка бере на варштат.
Стрічу поведут взаімно авторкы кножок. Промоция публикаций пройде в Варштатах Культуры (ул. Ґродска 5а, Люблин) о 17.30 год.
Коментарі