О трупарнях, обзерачах трупів і інчых / выклад Даміана Новака – пятниця, 10.30 год.

Точна тема того выкладу то: Санітарна ситуация і публичне здоровля в ґорлицкым повіті в ХІХ і в першій половині ХХ столітя. «Квестиі звязаны з санітарном ситуацийом ци шыроко понятыма квестиями охороны здоровля – особливо тыма, што тыкают публичного здоровля – становлят важну простір в істориі каждого реґіону ци місцевости» – повіл Даміан Новак, історик і реґіоналиста.

Хоц тема є обшырна, то прелеґент вказал єй в спосіб stricte локальный – на примірах выбраных місцевости. На выкладі зреферувал не лем проблемы в доступі до здравотной опікы – до шпыталів, дохторів, акушерок, але оповіл тіж о темах звязаных зо студнями, цмотнерями, обзерачами трупів, трупарнями. Омовлены были темы тыкаючы ветеринарийной опікы над худобом.

Даміан Новак – культурознавця, історик. Закінчыл культурознавство (культура карпатскых краів) в ДВПШ в Саноку, етнічны одношыня і медженародны міґрациі на Ягайлоньскым Університеті, тепер кінчыт докторантскы студиі в обшыри істориі на Ряшівскым Університеті. В роках 2014-2017 працувал в ряшівскым Тереновым Одділіню Нацийонального Інституту Спадковины. Од 2018 до 2021 р. был музейным асистентом в Мазярскій Загороді в Лоси разом з церквю в Бортным – одділі Музею «Дворы Карвациянів і Ґладышів» в Ґорицях. Од 2021 р. робит як адюнкт в Музею Бічской Землі. Од 1997 р. працує соспільні в позаурядовых орґанізациях діючых для сохраніня материяльной спадковины Карпат. Єст автором парудесятьох публикаций односячых ся до діів церковной архітектуры, істориі Лемковины ци моноґрафічных нарисів місцевости з обшыри Ґалициі і Подоля.