Обзерач Природы #11 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 27. листопада/новембра 2020 р., о год. 13.00. «Обзерач Природы» то пропозиция для любителів природы, лісовых звірят, вандрівок в незнане.

Пришол час, жебы оповісти о чымси важным і близкым каждому жыючому на Лемковині, о нафтовій ропі. Тема долга і скомпликувана. З той причыны будеме в найблизшых двох одтинках «Обзерача Природы» бесідувати о тым скальным олію. Перша част буде тыкала загальных і основных інформаций – дознаме ся, як возникат нафтова ропа, якій має хімічный склад, якє має походжыня і як вельо часу треба, жебы сме днес могли так доволі выдобывати ропу з землі? Сте заінтересуваны, ци Лемковина єст фактичні такым «карпатскым Кувейтом»? То слухайте конечні «Обзерача Природы» о 13.00 год.!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.